کراچی: روسی قونصل جنرل آندرے فیڈروف کا کہنا ہے کہ پاکستان حکومت رابطہ کریگی تو ہم سستا تیل فراہم کریں گے۔
کراچی میں پریس کانفرنس کرتے ہوئے روس کے قونصل جنرل آندرے فیڈروف نے کہا کہ سابق وزیراعظم کے دورہ روس میں تیل کی تجارت پر بات ہوئی تھی، جس کے بعد پاکستان کی جانب سے کوئی سرکاری خط موصول نہیں ہوا۔
انہوں نے کہا کہ روس پر پابندیاں پاکستان سے تجارتی تعلقات کو متاثر کرسکتی ہیں، لیکن پاکستانی حکومت رابطہ کریگی تو ہم سستا تیل فراہم کریں گے۔
روس یوکرین جنگ کے حوالے سے گفتگو کرتے ہوئے ان کہا کہنا تھا کہ یوکرین کیساتھ تنازعے کا فوری حل نظر نہیں آرہا، یوکرین امن مذاکرات کیلئے سنجیدہ نہیں ہے۔
خیال رہے کہ وزیر خزانہ مفتاح اسماعیل نے دعوی کیا تھا کہ روس سے تیل خریدنے کیلئے پاکستان تحریک انصاف کی حکومت نے کوئی خط نہیں لکھا تھا۔
مفتاح اسماعیل کے بیان پر سابق وزیر مملکت برائے محصولات حماد اظہر نے ٹویٹر پر اپنی پوسٹ میں ایک خط شیئر کرتے ہوئے وزیر خزانہ کو جواب دیتے ہوئے لکھا تھا کہ روس ہمیں رعایتی تیل فروخت کرنے کے لیے پُر جوش تھا، وزیر خزانہ کو روس کے وزیر توانائی سے بات کرنی چاہیے تھی۔
