کراچی : پاکستان کی جہاز رانی اور پٹرولیم مصنوعات کی تاریخ میں بڑی پیش رفت ہوئی ہے، روسی خام تیل لے کر بحری جہاز کراچی کی بندرگاہ پر پہنچ گیا۔
اس حوالے سے کراچی پورٹ ٹرسٹ کے ترجمان کا کہنا ہے کہ روس کا پہلا تیل بردار جہاز کراچی کی بندرگاہ پر لنگر انداز ہوگیا ہے۔
کے پی ٹی ترجمان کے مطابق پیور پوائنٹ نامی جہاز45ہزار142میٹرک ٹن تیل لے کر پہنچا ہے، روسی آئل ٹینکر پیور پوائنٹ کو او پی ٹو پر برتھ کیا گیا ہے۔
واضح رہے کہ وزیر مملکت برائے پیٹرولیم ڈاکٹر مصدق ملک نے گزشتہ دنوں روسی خام تیل کی امپورٹ کے بعد پیٹرولیم مصنوعات کے سستا ہونے کی خوشخبری دیتے کہا تھا کہ بحری جہاز عمان پہنچ چکے ہیں اور پاکستان کو سستے تیل کی سپلائی ایک ہفتے میں شروع ہو جائے گی۔
ان کا کہنا تھا کہ روس سے سستا تیل پاکستان آنے والا ہے، جیسے ہی روس سے تیل آئے گا، قیمتیں کم ہونا شروع ہوجائیں گی۔ پاکستان میں توانائی کے شعبے کا زیادہ تر دار و مدار درآمد ہو کر آنے والے ایندھن پر ہے جبکہ ملک میں پیٹرولیم مصنوعات کی قیتمیں ابھی تک کافی زیادہ تصور کی جا رہی ہیں۔
