ماسکو: روسی وزیر خارجہ سرگئی لاوروف نے کہا ہے کہ روس کی پاکستان کو تیل کی فراہمی میں امریکا رکاوٹ ڈالے گا۔
تفصیلات کے مطابق روسی وزیر خارجہ سرگئی لاوروف نے اس خدشے کا اظہار کیا ہے کہ امریکا، روس کی پاکستان کو تیل کی فراہمی کے معاہدے میں رکاوٹ ڈالے گا۔
وزیر خارجہ بلاول بھٹو کے ہمراہ پریس کانفرنس میں روسی وزیر خارجہ نے کہا کہ امریکا پاک روس توانائی ڈیل روکنے کی کوشش کرے گا۔
سرگئی لاوروف نے کہا کہ امریکا شرمناک اور غرور بھرے لہجے میں ہر ملک کو روس سے تجارت کرنے سے روکتا ہے، انھوں نے کہا امریکا نے حال ہی میں چین کو بھی دھمکایا ہے، جب کہ بھارت، ترکی اور مصر کو بھی دھمکیاں دی ہیں۔
واضح رہے کہ وزیرخارجہ پاکستان بلاول بھٹو زرداری اس وقت اپنے روسی ہم منصب کی دعوت پر ماسکو کے دورے پر ہیں، جہاں ان کی روس کے وزیر خارجہ سے وفود کی سطح پر بات چیت ہوئی ہے۔
