پاکستانی اداکارہ صبا قمر کو متحدہ عرب امارات کا گولڈن ویزا مل گیا۔
تفصیلات کے مطابق پاکستان کی نامور اداکارہ صبا قمر کو یو اے ای کی جانب سے 10 سالہ رہائشی گولڈن ویزا جاری کر دیا گیا ہے۔
اداکارہ صبا قمر نے اپنی انسٹاگرام اسٹوری پر اس اعزاز کو قبول کرتے ہوئے متحدہ عرب امارات کا شکریہ ادا کیا، صبا قمرنے اسٹوری شیئر کرتے ہوئے لکھا کہ دبئی نے ہمیشہ پاکستانی فنکاروں کو خیر سگالی کا پیغام دیا ہے اور انھیں کام کے بہترین مواقع فراہم کیے ہیں۔
واضح رہے کہ ٹی وی ڈراموں میں شان دار اداکاری کر کے پاکستان اور بیرون ملک اپنا لوہا منوانے والی اداکارہ صبا قمر نے اپنی اور اپنے ملک کی عزت کو ہمیشہ مقدم رکھا، انھوں نے ایک انٹرویو میں کہا تھا کہ ان کی پہلی ترجیح ہمیشہ پاکستانی شوبز انڈسٹری رہی ہے۔
View this post on Instagram
پاکستانی ڈراموں کی سپر اسٹار صبا قمر چھوٹی اسکرین سے بڑے پردے تک بھرپور اداکاری کی صلاحیتیں دکھاتی آئی ہیں، صبا قمر کے مطابق انھیں متعدد بار بولی ووڈ فلموں کی پیشکش ہوئی لیکن انھوں نے اسے ٹھکرا دیا، ان میں سیف علی خان کے ساتھ فلم ’’لو آج کل‘‘ ابھیشیک بچن کے ساتھ فلم ’’دلی 6‘‘ اور ایکتا کپور کی فلم میں عمران ہاشمی کے ساتھ کام کرنے کی پیش کش شامل ہیں۔
