کراچی : کہتے ہیں شوق کا کوئی مول نہیں ہوتا، اپنے دل کی آواز سننے والے زندہ دل لوگ اپنی خوشی کیلئے ہر وہ کام کر گزرتے ہیں جو انہیں پسند ہو۔
ایسی ہی ایک شخصیت کراچی کے رہائشی صابر بھائی کی ہے جن کے رقص کا مخصوص انداز سوشل میڈیا پر وائرل ہورہا ہے اور صارفین خوشگوار حیرت کے ساتھ ان کے بے ساختہ انداز کو پسند بھی کررہے ہیں۔
اے آر وائی نیوز کے پروگرام باخبر سویرا میں محمد شفیق عرف صابر بھائی کو مدعو کیا گیا، جنہوں نے اپنے شوق اور زندگی کے بارے میں ناظرین کو آگاہ کیا۔
صابر بھائی نے بتایا کہ وہ اپنے خاندان کی ہر خوشی میں شریک ہوتے ہیں اور بچوں کے ساتھ مل کر خوب ہلہ گلہ بھی کرتے ہیں، جس کی ویڈیوز وائرل ہوجاتی ہیں۔
یہی نہیں ان ویڈیوز کو دیکھ کر لوگوں نے مجھے اپنی نجی تقریبات میں بھی بلانا شروع کردیا ہے لیکن میں کسی بھی قسم کا کوئی معاوضہ نہیں لیتا۔
انہوں نے بتایا کہ سال 1968میں میں ایک اسٹیج اداکار تھا بہت سے ڈراموں میں کام کیا کمپیئرنگ کی لیکن شادی کے بعد یہ کام چھوڑ دیا تھا۔
ان کا کہنا تھا کہ مجھے کوئی سا بھی گانا دے دیں میں اس کی دھن پر ڈانس اسٹیپ خود بنا لیتا ہوں اور مجھے کسی ریہرسل کی ضرورت بھی نہیں ہوتی۔
