سابق آف اسپنر سعید اجمل نے ٹیم سلیکشن انگلی اٹھاتے ہوئے کہا ہے کہ ٹیم کے انتخاب میں پسند اور ناپسند کو ترجیح دی جاتی ہے۔
ماضی میں جادوگر بولر کے نام سے رائٹ آرم آف اسپن بولر نے مکہ مکرمہ میں عمرے کی سعادت حاصل کرنے کے بعد اے آر وائی نیوز سے خصوصی گفتگو کی۔
سعید اجمل انگلینڈ کے خلاف سیریز ہارنے پر پاکستانی ٹیم پر برس پڑے اور کہا کہ قومی ٹیم کی کارکردگی دیکھ کر سخت مایوسی ہوئی، ٹیم کی بولنگ، بیٹنگ اور فیلڈنگ ہر شعبے میں کارکردگی مایوس کن رہی۔
سابق اسٹار کھلاڑی کا کہنا تھا کہ کرکٹ بورڈ کے پسندیدہ کھلاڑیوں کو موقع دیا جاتا ہے، کپتان کی پسند کو بھی نظر انداز نہیں کیا جاتا، ٹیم میں پسند اور ناپسند کا عمل کارکردگی کو متاثر کرتا ہے۔
سعید اجمل نے کہا کہ قومی ٹیم کی کارکردگی بہتر بنانے کے لیے قومی ٹیم میں چند تبدیلیاں ناگزیر ہیں اور وہ ہونی چاہئیں۔
واضح رہے کہ شعیب ملک بھی ٹیم کی سلیکشن میں پسند اور ناپسند کے معاملے پر آواز اٹھا چکے ہیں۔
ایشیا کپ کے فائنل میں سری لنکا سے شکست کے بعد شعیب ملک نے اپنے ایک ٹوئٹ میں کسی کا بھی نام لیے بغیر کہا تھا کہ ہم دوستی، پسند اور ناپسند کے کلچر سے کب نکلیں گے۔
یاد رہے کہ انگلینڈ نے پاکستان کو 7 ٹی ٹوئنٹی میچز کی سیریز میں چار تین سے شکست دے کر سیریز اپنے نام کی تھی جب کہ اس سے قبل پاکستان نے ایشیا کپ کے فائنل میں سری لنکا سے شکست کھائی تھی۔
