The news is by your side.

Advertisement

لسانیت کی بنیاد پر فسادات کی سازش کامیاب نہیں ہوگی، سعید غنی

کراچی: وزیر تعلیم سندھ سعید غنی کا کہنا ہے کہ لسانیت کی بنیاد پر فسادات کی سازش کامیاب نہیں ہوگی، کراچی والوں نے پیغام دیا کہ سندھ کی تقسیم نہیں ہونے دیں گے۔

اے آر وائی نیوز کی رپورٹ کے مطابق وزیر تعلیم سندھ سعید غنی نے یکجہتی ریلی سے خطاب کرتے ہوئے کہا کہ کراچی کے شہریوں نے تعصب پرستانہ بیانیے کو مسترد کردیا، شہریوں نے وفاق اور ایم کیو ایم کے خلاف نکل کر تحریک کی ابتدا کردی۔

سعید غنی نے کہا کہ 5 کلو میٹر پر پھیلی طویل ریلی کراچی کی سیاسی تاریخ کی بڑی ریلی تھی، ایم کیو ایم نے چند فٹ کی ریلی نکالی، پی پی کی اپیل پر عوام کا سمندر امڈ آیا، کراچی کے عوام صرف اور صرف پیپلزپارٹی کے ساتھ ہیں۔

انہوں نے حکومت پر تنقید کرتے ہوئے کہا کہ بزدار کہاں سے جیتے لاہور پر کیوں حکومت کرتے ہیں، وزیراعظم کہاں سے جیتے اسلام آباد پر کیوں حکومت کرتے ہیں۔

صوبائی وزیر نے کہا کہ فواد چوہدری کو پی پی ریلی کی سمجھ نہ آنا ان کی سیاسی کم عقلی کو ثابت کرتا ہے۔

کراچی کو سندھ سے کوئی نہیں چھین سکتا، نثار کھوڑو

پیپلزپارٹی کے رہنما نثار کھوڑو نے کہا کہ پاکستان سندھ نے بنایا اور آج لوگ سندھ توڑنے کی باتیں کرتے ہیں، کراچی سندھ کا دارالحکومت ہے اس کو سندھ سے کوئی نہیں چھین سکتا۔

نثار کھوڑو نے کہا کہ ملک میں خوشحالی صرف بلاول بھٹو لائیں گے، کہتے ہیں پیپلزپارٹی ختم ہوگئی، ابھی تو 10 جماعتیں اکٹھی ہوں گی پھر سوچو تمہارا کیا حال ہوگا۔

آئندہ بلدیاتی الیکشن میں پیپلزپارٹی کا میئر آئے گا، وقار مہدی

پیپلزپارٹی کے رہنما وقار مہدی نے کہا کہ بلاول بھٹو عوام کے مسائل حل کریں گے، عوام پیپلزپارٹی پر اعتماد کرتے ہیں،بلدیاتی الیکشن میں پیپلزپارٹی کامیاب ہوگی، آئندہ بلدیاتی الیکشن میں پیپلزپارٹی کا میئر آئے گا۔

Comments

یہ بھی پڑھیں