کراچی : وزیربلدیات سندھ سعید غنی نے کہا ہے کہ وفاقی حکومت نہیں بلکہ پی ٹی آئی اپنا بلدیاتی نظام لانا چاہتی ہے، حکومت کو ڈیم بنانے کیلئے کوئی بہتر طریقہ ڈھونڈنا چاہیئے۔
ان خیالات کا اظہار انہوں نے کراچی کی نجی یونیورسٹی میں اسٹریٹ چلڈرن مسائل اور انکے حل کے عنوان پر تقریب سے بحیثیت مہمان خصوصی خطاب کرتے ہوئے کیا۔
وزیر بلدیات سندھ سعید غنی کا کہنا تھا کہ ملک کے دیگرمسائل کی طرح اسٹریٹ چلڈرن کا مسئلہ بھی بہت اہم ہے، غربت اورغیرمعیاری تعلیمی ادارے مسائل بڑھا رہے ہیں۔
سعید غنی نے کہا کہ بھکاری مافیا بچوں کو جان بوجھ کر معذور کرکے بھیک منگوانے کے لیے استعمال کرتے ہیں، اسٹریٹ چلڈرن اہم مسئلہ ہے جس کی سب سے بڑی وجہ غربت اور ناقص تعلیمی ادارے ہیں۔
کراچی سے اے آر وائی نیوز کی نمائندہ عمبرین الطاف کے مطابق تحریک انصاف پر تنقید کرتے ہوئے وزیر بلدیات کا کہنا تھا کہ وفاقی حکومت نہیں بلکہ پی ٹی آئی اپنا بلدیاتی نظام لانا چاہتی ہے، ڈیم کے بارے میں ان کا کہنا تھا کہ حکومت کو ڈیم بنانے کیلئے کوئی بہتر طریقہ ڈھونڈنا چاہیئے۔
سخی حسن پمپنگ اسٹیشن کے ٹینک سے مردہ کتا برآمد ہونے کے معاملے پر انہوں نے کہا کہ مرا ہوا جانور ملنا باعث تشویش ہے اس پر سخت کارروائی ہوگی، کوشش کررہا ہوں کہ لوگ اپنی ذمہ داریاں پوری کریں۔
انہوں نے واضح کیا کہ جن بلدیاتی اداروں کے سربراہ صحیح کام نہیں کرپائے تو انہیں گھر بھیج دوں گا۔ دو روزہ تقریب میں کراچی کی مختلف جامعات کے طالب علموں نے حصہ لیا اور اپنی تقاریر کے ذریعے اسٹریٹ چلڈرن کے مسائل پر پر روشنی ڈالی۔
