لندن: برطانیہ میں ہونے والی ایک تقریب میں پاکستانی ہائی کمشنر کی غیر مہذبانہ حرکتوں نے تقریب میں شریک پاکستانیوں کے سر شرم سے جھکادیے۔
تفصیلات کے مطابق لندن میں منعقدہ تقریب میں پاکستانی ہائی کمشنر صاحب زادہ احمد خان بطور مہمانِ خصوصی مدعو تھے، خطاب کے لیے مائیک دیا گیا تھا ہائی کمشنر خود پر قابو نہ رکھ سکے اور تقریب کی نظامت شروع کردی۔
مائیک سنبھالتے ہی پاکستانی ہائی کمشنر نے تقریب کی کمپئرنگ کی ذمہ داری ازخود سنبھال لی جس پر اسٹیج پر موجو د ادکار اور ہال میں موجود شرکاء پہلے تو دم بخود رہ گئے پھر مجبوراً ان کی باتوں پر ہنستے رہے۔
پاکستانی ہائی کمشنر صاحبزادہ احمد خان نے لیجنڈ اداکار جاوید شیخ کو بھی نہ بخشا اور انہیں الٹے سیدھے سوالات کرکے زچ کرتے رہے۔ جاوید شیخ، ان کی ان حرکتوں پر تھوڑے ناراض بھی نظر آئے۔
ہائی کمشنر کی ان حرکتوں سے پریشان تقریب کی انتظامیہ نے پروگرام کی میزبان کے ذریعے انہیں متعدد بار ٹوکا اور مہذب انداز میں روکنے کی بھی کوشش کی تاہم انہوں نے کسی کی ایک نہ سنی اور اپنی سی کرکے چلتے بنے۔
یہ تقریب 9 ستمبر کو لندن میں منعقد ہوئی تھی۔
