پاکستان شوبز انڈسٹری کی ماضی کی معروف اداکارہ نشو بیگم اپنی بیٹی اداکارہ صاحبہ سے گزشتہ 8 ماہ سے نہ مل پانے کی بات کرتے ہوئے لائیو شو پر آبدیدہ ہوگئیں۔
صاحبہ ریمبو انڈسٹری کا ایک بڑا نام ہے، ان کی والدہ نشو بیگم اپنے حوالے سے ایک ماضی کی اسٹار ہیں، ماضی میں اداکارہ کا فلم انڈسٹری میں ایک بڑا نام تھا۔
حال ہی میں اداکارہ صاحبہ 40 سالوں بعد پہلی بار اپنے والد سے ملی اور ایسا لگتا ہے کہ ان کی والد سے ملاقات سے کچھ مسائل پیدا ہوئے ہیں۔
نشو بیگم نے حال ہی میں نجی ٹی وی کے ایک پروگرام میں شرکت کی، جہاں انہوں نے مختلف معاملات پر کھل کر بات کی جس کی ویڈیو سوشل میڈیا پر خوب وائرل ہورہی ہے۔
شو میں نشو بیگم سے زندگی کے پچھتاوے سے متعلق پوچھا گیا، اس سوال کے جواب میں انہوں نے کہا کہ میری پہلی شادی میرا ایک غلط فیصلہ تھا اور اس پر مجھے پچھتاوا ہے۔
نشو بیگم نے بتایا کہ میں نے فلم اداکاری کا آغاز کرنے کے 5 سال بعد جوانی میں ہی شادی کی تھی لیکن اب سوشل میڈیا پر افواہیں پھیلائی جا رہی ہیں کہ میں نے اسکول کے زمانے میں ہی متعدد شادیاں کیں جو کہ غلط ہے۔
ماضی کی اداکارہ نے بتایا کہ پہلی شادی نے میرا سب کچھ چھین لیا تھا، پہلی شادی نے مجھ سے میری گاڑیاں، گھر، زیور اور بہت سی قیمتی چیزیں چھین لیں تھیں۔
اداکارہ کا کہنا تھا کہ مجھے مال و ملکیت کے چھن جانے پر کوئی افسوس نہیں تھا، میں نے اپنی پہلی شادی سے ایک قیمتی چیز اپنی بیٹی بچائی جو کہ اس وقت میرے پیٹ میں پل رہی تھیں۔
نشو بیگم نے کہا کہ لیکن اب کئی سال بعد مجھ سے سب کچھ چھن چکا ہے، میں بے یارو مددگار بن چکی ہیں، خود کو بے بس محسوس کرتی ہیں۔
سینیئر اداکارہ نے کہا کہ پہلے شوہر کی وجہ سے میں گزشتہ 8 ماہ سے اپنی بیٹی صاحبہ سے نہیں مل سکیں، بیٹی سے نہ مل پانے کی بات کرتے ہوئے نشو بیگم آبدیدہ ہوگئیں۔
اگرچہ نشو بیگم نے بتایا کہ گزشتہ 8 ماہ سے وہ اپنی بیٹی صاحبہ سے نہیں مل پائیں اور انہوں نے اس کا الزام اپنے پہلے شوہر اور صاحبہ کے والد پر بھی لگایا، تاہم انہوں نے واضح نہیں کیا کہ بیٹی ان سے کیوں نہیں مل رہیں؟۔
View this post on Instagram
