اسلام آباد : صاحبزادہ عامر جہانگیر نے معاون خصوصی برائے وزیراعظم کا عہدہ لینے سے معذرت کر لی ہے، ان کا کہنا ہے کہ عمران خان کا مجھ پر اعتماد کرنا بہت بڑی بات ہے۔
تفصیلات کے مطابق بطورمعاون خصوصی برائے وزیراعظم تعیناتی کے معاملے پر صاحبزادہ عامرجہانگیر نےعہدہ لینے سے معذرت کرلی اور وزیراعظم کو آگاہ کردیا ہے۔
عامر جہانگیرکوغیرملکی سرمایہ کاری کیلئےوزیراعظم کامعاون خصوصی مقررکیا گیا تھا اور تقرری کا نوٹیفکیشن 15 اکتوبر کو جاری کیا۔
ذرائع کا کہنا ہے کہ وفاقی حکومت عامرجہانگیر کی تقرری کا نوٹی فکیشن واپس لے لے گی۔
گذشتہ روز اے آر وائی نیوز کے پروگرام پروگرام الیونتھ آور میں گفتگو کرتے ہوئے کہا تھا کہ عمران خان کامجھ پراعتمادکرنابہت بڑی بات ہے، دنیا بھر میں شوکت خانم کیلئے کام کرتا رہا، میراکوئی کرمنل ریکارڈ نہیں ہے۔
صاحبزادہ عامرجہانگیر کا کہنا تھا کہ ایک دن تو کیا میں ایک گھنٹہ کیلئےبھی حراست میں نہیں رہا، مجھ پرکوئی بینک کرپٹسی کاکوئی چارج نہیں لگا، میری کسی کمپنی کاکوئی فراڈنہیں نکلا۔
انھوں نے مزید کہا کہ 9یوٹیلیٹی بلزکی ادائیگی کامسئلہ تھا وہ میں نے حل کردیا، مجھ پرکہیں جانے پر پابندی نہیں ہے، میری کمپنیوں کی3بار دیوالیہ ہونے کی بات جھوٹی ہے۔
صاحبزادہ عامرجہانگیر کا کہنا تھا کہ کوئی ایسا کام نہیں کروں گا، جس سے میرے لیڈر پر انگلی اٹھے۔
