بی آر چوپڑا کو ہندوستان کا عظیم فلم ساز تسلیم کیا جاتا ہے جنھوں نے بولی وڈ کو کئی سپرہٹ فلمیں دیں۔ مشہور شاعر اور کام یاب فلمی گیت نگار کی حیثیت سے ساحر لدھیانوی کو بھی ان کے ساتھ کام کرنے کا موقع ملا تھا۔ اس دوران ان دونوں کے درمیان دوستی کا تعلق استوار ہوگیا۔ یہاں ہم جو قصّہ بیان کرنے جارہے ہیں، اس کا تعلق ساحر لدھیانوی کی حقیقی زندگی سے ہے۔
‘گمراہ’ بی آر چوپڑا کی فلم تھی اور جن دنوں وہ یہ فلم بنا رہے تھے، ان کا کسی کام سے ساحر کے گھر جانا ہوا۔ وہاں میز پر ساحر لدھیانوی کی ڈائری رکھی ہوئی تھی جسے فلم ساز نے اٹھایا اور ورق گردانی شروع کر دی۔ انھیں اس میں تحریر کردہ ایک نظم بہت پسند آئی۔ فلم ساز بی آر چوپڑا نے ساحر سے کہا کہ وہ اس نظم کو اپنی فلم ‘گمراہ’ میں شامل کرنا چاہتے ہیں۔ ساحر نے انکار کر دیا۔ بی آر چوپڑا نے اصرار کیا تو ساحر نے انھیں کہاکہ یہ نظم نہیں ہے بلکہ اس کی آپ بیتی ہے، اور چوں کہ ان اشعار کا تعلق اس کی ذات سے ہے، اس لیے وہ اسے کسی فلم کے لیے نہیں دے سکتا۔ ساحر لدھیانوی کے عشق اور رومان کے قصّے اس زمانے میں عام تھے۔ ساحر ایک قبول صورت انسان تھے، لیکن ایک مقبول شاعر ضرور تھے اور رومان پرور مشہور تھے۔ کہتے ہیں کہ یہ نظم ساحر نے سدھا ملہوترا سے اپنے ناکام عشق کے بعد لکھی تھی۔ بی آر چوپڑا نے کہا کہ میری آنے والی فلم کے ایک منظر کے لیے اس سے اچھی نظم کوئی نہیں ہو سکتی اور تم مجھے انکار نہ کرو۔ ساحر نے بار بار اصرار کرنے پر وہ نظم بی آر چوپڑا کو دے دی۔
موسیقار روی کے ساتھ مہندر کپور کی آواز میں یہ نظم بی آر چوپڑا نے اپنی فلم ‘گمراہ’ میں شامل کر لی جسے شائقین نے بہت پسند کیا۔ یہ نظم آپ نے بھی سنی ہوگی، ‘چلو ایک بار پھر سے اجنبی بن جائیں ہم دونوں…’
اس نظم کے یہ اشعار اس زمانے میں ہر دل شکستہ، ناکام عاشق اور حالات کے آگے ڈھیر ہوجانے والا ضرور پڑھتا یا اپنی ڈائری میں لکھ لیتا تھا اور لوگ اس نظم کے یہ اشعار خاص طور پر پڑھتے تھے۔
تعارف روگ ہو جائے تو اس کا بھولنا بہتر
تعلق بوجھ بن جائے تو اس کو توڑنا اچھا
وہ افسانہ جسے انجام تک لانا نہ ہو ممکن
اسے اک خوبصورت موڑ دے کر چھوڑنا اچھا
چلو ایک بار پھر سے اجنبی بن جائیں ہم دونوں
