ساہیول: پنجاب کے شہر ساہیوال کے ایک سرکاری اسپتال میں ماں کے سوتے ہی خاتون اس کا نومولود بچہ چرا کر بھاگ گئی۔
تفصیلات کے مطابق ساہیوال میں گورنمنٹ حاجی عبدالقیوم اسپتال سے نومولود بچہ اغوا ہونے کا واقعہ پیش آیا ہے، پولیس کا کہنا ہے کہ خاتون کے ہاں گزشتہ رات بچے کی پیدائش ہوئی تھی۔
اے آر وائی نیوز کے مطابق بلال کالونی کی رہائشی خاتون طیبہ نامی خاتون نے گزشتہ رات حاجی عبدالقیوم اسپتال میں بچے کو جنم دیا تھا، زچہ کے سونے پر وارڈ میں موجود خاتون بچے کو اٹھا کر لے گئی۔ اے آر وائی نیوز کو اغوا کار خاتون کی سی سی ٹی وی فوٹیج بھی موصول ہو گئی ہے، فوٹیج میں خاتون کو مغوی بچے کو اسپتال سے لے جاتے دیکھا گیا۔
ورثا کے مطابق ماں کے سونے پر وارڈ میں موجود عورت بچے کو اٹھا کر لے گئی، ورثا کی جانب سے واقعے کے خلاف احتجاج بھی کیا گیا، واقعے کی اطلاع ملنے کے بعد پولیس تھانہ سٹی نے اسپتال پہنچ کر تفتیش کی، اور اسپتال اور گرد و نواح میں موجود سی سی ٹی وی کیمروں کی مدد سے ملزمہ کی تلاش شروع کر دی ہے۔
