بالی ووڈ اداکار سیف علی خان حملہ کیس میں ایک بڑی پیش رفت سامنے آئی ہے جس کے بعد کیس نے نیا موڑ اختیار کرلیا۔
بھارتی میڈیا کے مطابق بالی ووڈ اداکار کی رہائش گاہ سے حاصل کیے گئے فنگر پرنٹس کے نمونے مبینہ طور پر حملے میں ملوث غیر ملکی محمد شریف الاسلام شہزاد کے فنگر پرنٹس سے میل نہیں کھاتے۔
بھارتی میڈیا کے مطابق ممبئی پولیس نے سیف علی خان کی رہائش گاہ سے فنگر پرنٹس کے 19 نمونے حاصل کیے تھے، اس فنگر پرنٹس کو ریاستی کرمنل انویسٹی گیشن ڈپارٹمنٹ (سی آئی ڈی) کے فنگر پرنٹ بیورو بھیجوایا گیا تھا۔
بھارتی میڈیا کے مطابق سی آئی ڈی کی سسٹم رپورٹ میں انکشاف ہوا ہے کہ وہ پرنٹس شریف الاسلام کے فنگر پرنٹس سے مطابقت نہیں رکھتے۔
یہ بھی پڑھیں: چاقو حملے کے بعد سیف علی خان نے پہلا بیان جاری کر دیا
چاقو حملے کے بعد سیف علی خان نے پہلا بیان جاری کر دیا
سیف علی خان حملہ کیس میں گرفتار ملزم کے وکیل کا بڑا دعویٰ
میڈیا رپورٹ کے مطابق سی آئی ڈی نے ممبئی پولیس کو فنگر پرنٹس کے منفی نتیجے سے متعلق آگاہ کردیا ہے، تاہم ممبئی پولیس نے جانچ پڑتال کے لیے مزید نمونے آگے بھیج دیئے ہیں۔
یاد رہے کہ اس سے قبل ملزم کی عدالت میں پہلی پیشی پر ملزم کے وکیل نے تمام الزامات کو من گھڑت قرار دیتے ہوئے دعویٰ کیا تھا کہ اس کے مؤکل کے خلاف لگائے گئے الزامات جھوٹے ہیں اورہائی پروفائل کیس ہونے کے سبب اسے قربانی کا بکرا بنایا جا رہا ہے۔
یاد رہے کہ بالی ووڈ اداکار سیف پر 16 جنوری کو رات گئے گھر میں گھسنے والے شخص نے چاقو سے حملہ کردیا تھا، جس سے وہ شدید زخمی ہوگئے تھے۔
سیف علی خان کی اسپتال میں متعدد سرجریز کی گئی تھیں اور انہیں 6 دن بعد 21 جنوری کی سہ پہر کو ڈسچارج کیا گیا تھا جس کے بعد ان کا بیان بھی لیا گیا تھا۔
واضح رہے جہ ملزم شریف الاسلام نے پولیس کو اداکار کے گھر میں چوری کی غرض سے گھسنے کی وجہ بتاتے ہوئے بیان دیا تھا کہ کسی نے پیسوں کے عوض اس سے جعلی شہریت کے دستاویز بنوانے کا وعدہ کیا تھا، اس وجہ سے میں نے سیف علی خان کے گھر میں چوری کی کوشش کی۔
ملزم کے اس بیان کے بعد ممبئی پولیس نے چاقو حملہ کیس کا دائرہ وسیع کرتے ہوئے اب اس شخص کی تلاش بھی شروع کردی ہے، جس نے شریف الاسلام سے جعلی دستاویزات بنوانے کا وعدہ کیا تھا۔
