ممبئی: بالی ووڈ کے چھوٹے نواب اداکار سیف علی خان پر ہونے والے حملے کے الزام میں گرفتار بنگلا دیشی ملزم شریف الاسلام شہزاد نے مبینہ طور پر جرم کا اعتراف کر لیا۔
بھارتی میڈیا رپورٹس کے مطابق 30 سالہ بنگلہ دیشی شہری کو اتوار کے روز اداکار سیف علی خان کے گھر میں گھس کر انہیں چاقو مارنے کے الزام میں گرفتار کیا گیا تھا جس نے اب مبینہ طور پر اس نے جرم کا اعتراف کرتے ہوئے کہا ہے کہ ہاں، میں نے کیا ہے۔
یہ بھی پڑھیں: چاقو حملے کے بعد سیف علی خان نے پہلا بیان جاری کر دیا
سیف علی خان حملہ کیس میں گرفتار ملزم کے وکیل کا بڑا دعویٰ
سیف علی خان پر حملہ کرنے والا ملزم 70 گھنٹے بعد گرفتار
ممبئی پولیس ذرائع کا کہنا ہے کہ 30 سالہ محمد شریف الاسلام شہزاد نے اعترافِ جرم کرتے ہوئے کہا ہے کہ ’ ہاں، میں نے ہی یہ حملہ کیا ہے‘۔
پولیس ذرائع کے مطابق محمد شریف الاسلام شہزاد کو گزشتہ روز ممبئی کے باندرہ علاقے میں سیف علی خان کے گھر سے تقریباً 35 کلومیٹر دور علاقے سے گرفتار کیا گیا تھا۔
ممبئی پولیس نے لیبر کنٹریکٹر کی فراہم کردہ معلومات کی بنیاد پر 7 گھنٹے جاری رہنے والے آپریشن کے بعد شہزاد کو جنگلاتی علاقے میں لیبر کیمپ سے گرفتار کیا۔
ممبئی کے سینئر پولیس افسر کے مطابق دورانِ تفتیش ملزم نے اعترافِ جرم کیا ہے اور کہا کہ ہاں میں نے ہی حملہ کیا ہے۔
یاد رہے کہ اس سے قبل ملزم کی گرفتاری کے بعد اسے عدالت میں پیش کیا گیا تھا جہاں ملزم کے وکیل نے عدالت کو بتایا تھا کہ ان کے مؤکل کے پاس سے کچھ برآمد نہیں ہوا، انہیں اس کیس میں پھنسایا جا رہا ہے۔
واضح رہے کہ رواں ہفتے بدھ اور جمعرات کی درمیانی شب تقریباً 3 بجے کے قریب ممبئی شہر میں سیف علی کے باندرا والے گھر میں ڈکیتی کی کوشش کی گئی جسے اداکار نے مزاحمت کرکے ناکام بنایا۔
مزاحمت کے دوران اداکار پر چاقو سے حملہ کیا گیا جس سے انہیں 6 زخم آئے جن میں سے 2 کافی گہرے تھے جبکہ ایک زخم ریڑھ کی ہڈی کے قریب ترین تھا۔
