اسلام آباد : سابق سینیٹر اور احتساب کمیشن کے سابق سربراہ سیف الرحمان نے کہا ہے کہ لندن کی جائیداد شیخ جاسم کی تھی، یہ فلیٹ نوازشریف کو قطر میں سرمایہ کاری کے بدلے ملے، نواز شریف کے ہیلی کاپٹر کے معاملے میں میری کوئی مداخلت نہیں تھی وہ ہیلی کاپٹر قطر کے خاندان نے نواز شریف کو دیا تھا، جس کا باقاعدہ کرایہ دیا جاتا تھا۔
ان خیالات کا اظہار انہوں نے اے آر وائی نیوز کے پروگرام آف دی ریکارڈ میں میزبان کاشف عباسی سے گفتگو کرتے ہوئے کیا، پروگرام آف دی ریکارڈ میں سیف الرحمان نے نیا پنڈورا باکس کھول دیا۔
ان کا کہنا ہے کہ لندن کی جائیداد شیخ جاسم کی تھی، جو بعد میں نوازشریف کوسرمایہ کاری پرملی، نواز شریف کو ملنے والے ہیلی کاپٹر کے حوالے سے سیف الرحمان نے بتایا کہ یہ ہیلی کاپٹر یوکرائن سے خریدا گیا تھا،جو روس کے راستے پاکستان لایا گیا تھا۔
یہ ہیلی کاپٹربعد میں کریش ہوگیا تھا۔اور یہ میاں صاحب کے زیر استعمال تھا، کیونکہ میں قطر میں تھا تو اس لیے جب یہ ذکر آتا ہے تو میڈیا میرا نام اچھالنا شروع کردیتا ہے حالانکہ اس سے میرا کوئی تعلق نہیں۔
ایک سوال کے جواب میں ان کا کہنا تھا کہ میاں نواز شریف نے جو اسمبلی میں تقریر کی وہ سو فیصد درست تھی۔
