قومی ٹیم کے اوپنر بیٹر صائم ایوب نے سابق کپتان شاہد آفریدی کا ریکارڈ برابر کردیا۔
بلاوائیو میں کھیلے گئے دوسرے ون ڈے میچ میں پاکستان نے زمبابوے کو کو با آسانی 10 وکٹوں سے شکست دے کر تین میچوں کی سیریز 1-1 سے برابر کردی، صائم ایوب کو شاندار سنچری پر میچ کا بہترین کھلاڑی قرار دیا گیا۔
زمبابوے کی جانب سے دیے گئے 146 رنز کے ہدف کو پاکستان ٹیم کے اوپنرز نے ہی 19 ویں اوور میں حاصل کر لیا۔ صائم ایوب نے اپنے ون ڈے کیریئر کی پہلی سنچری اسکور کی اور ٹیم کی فتح میں اہم کردار ادا کیا۔
نوجوان اوپنر نے 62 گیندوں پر 113 رنز کی نا قابل شکست دھواں دھار اننگ کھیلی۔ اس میں 3 چھکے اور 17 چوکے شامل تھے۔
صائم ایوب نے بولنگ میں بھی ایک زمبابوین کھلاڑی کو پویلین کی راہ دکھائی۔
اوپنر بیٹر نے 53 گیندوں پر سنچری اسکور کرکے سابق کپتان شاہد آفریدی کا تیسری تیز ترین سنچری کا ریکارڈ برابر کردیا ہے۔
واضح رہے کہ شاہد آفریدی نے سری لنکا کے خلاف 37 گیندوں پر سنچری اسکور کرکے عالمی ریکارڈ بنایا تھا، انہوں نے دوسری تیز ترین سنچری 45 گیندوں پر بھارت کے خلاف بنائی جبکہ تیسری تیز ترین سنچری 53 گیندوں پر بنگلا دیش کیخلاف تھی۔
