ممبئی: ماضی کی بالی ووڈ اداکارہ سائرہ بانو میں اکیوٹ کورونری سنڈروم کی تشخیص ہو گئی ہے۔
تفصیلات کے مطابق بالی ووڈ کے مرحوم لیجنڈری اداکار دلیپ کمار کی اہلیہ سائرہ بانو گزشتہ دنوں دل کا دورہ پڑنے پر اسپتال منتقل کی گئی تھیں، وہ اس وقت ممبئی کے ہندوجا اسپتال کے آئی سی یو میں داخل ہیں، جہاں ڈاکٹرز کی زیرِ نگرانی اُن کا علاج جاری ہے۔
بھارتی میڈیا کے مطابق سائرہ بانو کو سانس لینے میں دشواری، ہائی بلڈ پریشر اور ہائی شوگر کی شکایات لاحق ہیں، 28 اگست کو انھیں اسپتال میں داخل کیا گیا تھا، جس کے بعد اُن کے کچھ ٹیسٹ کیے گئے جن کی رپورٹس آگئی ہیں۔
ہندوجا اسپتال کے ایک ڈاکٹر نے بھارتی میڈیا سے گفتگو کرتے ہوئے بتایا کہ سائرہ بانو کے ٹیسٹ کی رپورٹس کے مطابق اُنھیں اکیوٹ کورونری سنڈروم (Acute coronary syndrome) کی تشخیص ہوئی ہے۔
دلیپ کمار کی موت کا صدمہ، سائرہ بانو کو دل کا دورہ
جب اچانک دل کی طرف جانے والے خون کے بہاؤ میں کمی آ جاتی ہے، تو اس سے وابستہ حالتوں کو بیان کرنے کے لیے یہ اصطلاح (اکیوٹ کورونری سنڈروم) استعمال کی جاتی ہے، ان حالتوں میں ایک دل کا دورہ (مایو کارڈیل انفارکشن) بھی ہے، یعنی جب خلیات مرنے کی وجہ سے دل کے ٹشوز تباہ یا ختم ہو جاتے ہیں۔
ڈاکٹر نے بتایا کہ سائرہ بانو اپنے شوہر دلیپ کمار کی موت کے بعد سے ڈپریشن سے بھی لڑ رہی ہیں، اُنھیں زیادہ نیند نہیں آتی، ار وہ گھر جانا چاہتی ہیں۔
یاد رہے کہ 7 جولائی 2021 کو بالی ووڈ فلم نگری پر طویل عرصے تک راج کرنے والے لیجنڈری اداکار یوسف خان المعروف دلیپ کمار 98 سال کی عُمر میں انتقال کر گئے تھے۔
