کراچی : پاکستان شوبز کے لیجنڈ اداکار ساجد حسن نے شادی سے پہلے اپنی ہونے والی بیوی کو ایسا پیغام دیا کہ سننے والے ہنس ہنس کر لوٹ پوٹ ہوگئے۔
پاکستان کے مشہور ترین ڈراموں”دھوپ کنارے”، "خلیج”، "ستارہ اور مہر النسا” اور دیگر میں اپنی شاندار اور برجستہ اداکاری کے جوہر دکھانے والے ساجد حسن نے اے آر وائی ڈیجیٹل کے پروگرام گڈ مارننگ پاکستان میں شرکت کی ان کے ہمراہ ان کی اہلیہ شکیلہ ساجد بھی موجود تھیں۔
اس موقع پر گفتگو کرتے ہوئے ساجد حسن اور ان کی اہلیہ نے اپنی شادی سے پہلے کی زندگی کے بارے میں بتایا اور یہ بھی بتایا کہ ان دونوں کی پہلی ملاقات کب کیسے اور کہاں ہوئی؟
پروگرام میں گفتگو کرتے ہوئے ساجد حسن کی اہلیہ شکیلہ ساجد نے بتایا کہ یہ مجھ سے باتیں کرنے کیلئے بار بار فون کیا کرتے تھے اور میں ہربار ان کو منع کردیا کرتی تھی۔
ایک دن ایسا ہوا کہ انہوں نے مجھ سے کہا کہ میں کسی کام سے لاہور جارہا ہوں اور اگر میری واپسی پر آپ نے ہاں نہ کی تو "اللہ کرے آپ مرجائیں” یہ بات سن کر میزبان ندا یاسر نے بھی زور دار قہقہہ لگایا۔
اس دوران ساجد حسن کی کیفیت "کاٹو تو لہو نہیں” کے مصداق تھی اور وہ بار بار گفتگو کا زاویہ بدلنے کی کوشش کرتے رہے تاہم ان کی اہلیہ نے بھی ہار نہ مانی اور سارا قصہ بیان کیا۔
ایک سوال کے جواب میں ساجد حسن کا کہنا تھا کہ مجھے ایسی ہی بیوی چاہیے تھی جسے میری بالکل پرواہ نہ ہو کہ میں کب آتا ہوں کہاں جاتا ہوں، اس دوران دونوں میاں بیوی کے درمیان دلچسپ نوک جھوک بھی ہوتی رہی۔
