واشنگٹن: امریکا میں ری پبلکن رہنما ساجدتارڑ نے کہا ہے کہ وزیراعظم عمران خان نے دنیا میں پاکستان کا مثبت تشخص اجاگر کیا۔
تفصیلات کے مطابق پاکستان کے ڈپٹی چیف آف مشن رضوان شیخ کےاعزاز الوداعی عشائیے میں گفتگو کرتے ہوئے ساجد تارڑ کا کہنا تھا کہ عمران خان کے سیاسی قدکاٹھ کو فضل الرحمان شکست نہیں دے سکتے۔
انہوں نے کہا کہ کشمیر سے توجہ ہٹا کر فضل الرحمان مودی کے ایجنڈے کو فروغ دے رہے ہیں، وہ اپنے مقصد میں ناکام رہیں گے۔
خیال رہے کہ رواں سال جولائی میں وزیراعظم عمران خان کے دورہ امریکا کے موقع پر ساجد تارڑ کا کہنا تھا کہ وزیراعظم عمران خان کے امریکا کے دورے کو صدیوں یاد رکھا جائے گا، وہ جو بھی بولے وہ دل سے بولے، عمران خان اور آرمی چیف کامیاب دورے پر مبارکباد کے مستحق ہیں۔
ری پبلکن رہنما ساجد تارڑ نے اے آر وائی نیوز سے خصوصی بات چیت کرتے ہوئے یہ بھی کہا تھا کہ کبھی کسی لیڈر کا اتنا پرتپاک استقبال نہیں دیکھا گیا، وزیراعظم عمران خان نے تمام پاکستانیوں کا سر فخر سے بلند کیا ہے۔
وزیراعظم عمران خان کےامریکا کے دورے کو صدیوں یاد رکھاجائے گا، ساجد تارڑ
یاد رہے وزیراعظم عمران خان 3 روزہ دورے پر امریکا گئے تھے، جہاں انھوں نے امریکی صدر ٹرمپ، امریکی وزیر خارجہ، سینیٹرز اور دیگر اہم شخصیات سے ملاقاتیں کی تھیں۔
وزیر اعظم پاکستان عمران خان نے وائٹ ہاؤس میں امریکی صدر ڈونلڈ ٹرمپ سے ملاقات کی تھی، دریں اثنا امریکی صدر نے مسئلہ کشمیر پر پاکستان بھارت کے مابین ثالثی کی پیش کش کی۔
