اسلام آباد: ڈرگ ریگولیٹری اتھارٹی آف پاکستان (ڈریپ) نے جعلی ادویات کے خلاف ملک گیر کریک ڈاون کا فیصلہ کرلیا۔
تفصیلات کے مطابق ملکی مارکیٹ میں جعلی اینٹی بائیوٹک ادویات کی فروخت کا انکشاف سامنے آیا، جس کے بعد ڈرگ ریگولیٹری اتھارٹی آف پاکستان (ڈریپ) نے جعلی ادویات کے خلاف ملک گیر کریک ڈاون کا فیصلہ کرلیا۔
ڈریپ کی ٹیموں کو جعلی ادویات کے خلاف کریک ڈاون کے احکامات جاری کردیے گئے ہیں اور صوبائی دفاتر کو جعلی ادویات کے بارے مین مراسلہ بھی جاری کردیا ہے۔
مراسلے میں کہا گیا ہے کہ کراچی میں 12 دسمبر کو جعلی ادویات کے خلاف بڑا آپریشن ہوا، کراچی میں غیر قانونی دواساز فیکٹری پر چھاپہ مارا گیا تھا، جس میں ڈریپ نے فیکٹری سے بھاری مقدار میں جعلی ادویات برآمد کی تھیں۔
مراسلے میں کہنا تھا کہ فیکٹری سے جعلی اینٹی بایوٹک سیرپ، انجکشن،کیپسول اور آٹھ برانڈز کی جعلی اینٹی بائیوٹک برآمد ہوئی تھیں۔
ڈریپ نے بتایا کہ کراچی میں فیکٹری سے برآمد شدہ ادویات ڈریپ سے غیر رجسٹرڈ تھیں، فیکٹری مختلف کمپنیز، برانڈز کی جعلی اینٹی بائیوٹک تیار کر رہی تھی۔
فیکٹری سے برآمد ادویات پیکٹس پر فرضی تفصیلات درج تھیں جبکہ ادویات کے پیکٹس پر رجسٹریشن، مینوفیکچرنگ نمبرز جعلی تھے اور فیکٹری جعلی اینٹی بائیوٹک ادویات پر مختلف کمپنیز کی پیکنگ لگا رہی تھی۔
فیکٹری سے برآمد ادویات کے نمونے سنٹرل ڈرگ ٹیسٹنگ لیب بھجوائے تھے، جس کے بعد سنٹرل ڈرگ ٹیسٹنگ لیب نے برآمد ادویات کو جعلی قرار دیا تھا۔
صوبائی ڈریپ دفاتر کو فیکٹری کی تیارکردہ جعلی ادویات کی تفصیلات ارسال کردی ہے، فیکٹری کی تیارکردہ جعلی ادویات کی مارکیٹ ، جعلی اینٹی بائیوٹک انجکشن، سیرپ، کیپسول کی مارکیٹ میں دستیابی کا خدشہ ہے۔
ڈریپ کی صوبائی ٹیمیں میڈیسن مارکیٹ میں سرویلنس بڑھائیں، جعلی ادویات علاج کے دوران غیر موثر ہوتی ہیں اور جعلی ادویات جان لیوا، اموات کی شرح میں اضافے کا باعث ہیں۔
ڈسٹری بیوٹرز جعلی اینٹی بایوٹک کے بیچ مارکیٹ سپلائی نہ کریں، ڈریپ ٹیمیں مارکیٹ سے جعلی اینٹی بائیوٹک ادویات کے قبضہ میں لیں اور فارمیسیز جعلی اینٹی بائیوٹک کی سیل روکنے کیلئے سٹاک چیک کریں۔
ڈسٹریبیوٹرز، کیمسٹ جعلی اینٹی بائیوٹک کی موجودگی بارے ڈریپ کو اطلاع دیں جبکہ ڈاکٹرز مریضوں کو جعلی اینٹی بائیوٹک کے بیچ استعمال نہ کرائیں۔
