اپنے بیٹے ارباز خان کی دوسری شادی پر بالی وڈ کے معروف رائٹر سلیم خان نے کہا ہے میرے خیال میں کسی کی زندگی میں دخل اندازی نہیں کرنی چاہیے۔
بھارتی ذرائع ابلاغ سے گفتگو کرتے ہوئے بالی وڈ اسٹار سلمان خان کے والد نے کہا کہ میرے خیال میں یہ بہتر نہیں کہ کسی کی زندگی میں دخل اندازی کی جائے اس سے مسائل جنم لیتے ہیں۔ ارباز اور شوریٰ نے شادی کرنے کا فیصلہ کیا تو یہ کوئی گناہ نہیں ہے۔
بالی وڈ کے ویٹرن رائٹر کا کہنا تھا کہ اپنے بیٹے کے لیے بہت خوش ہوں اور میری دعائیں نئے جوڑے کے ساتھ ہیں۔
سلیم خان کا مزید کہنا تھا کہ میں نہیں سمجھتا کہ اس شادی پر بات کرنے کی کوئی ضرورت تھی ارباز خان تعلیم یافتہ اور سمجھدار ہے، اپنے فیصلے خود کر سکتا ہے،
View this post on Instagram
انھوں نے کہا کہ ارباز کو شادی کے لیے میری اجازت کی کوئی ضرورت نہیں، اگر وہ خوش ہے تو پھر میرے لیے کسی اور چیز کی کوئی اہمیت نہیں۔ ارباز نے پہلے بتایا تھا کہ اس نے دوسری شادی کرنے کا فیصلہ کیا ہے تو میں نے کہا کہ ٹھیک ہے۔
واضح رہے کہ ارباز خان نے گزشتہ دنوں بالی وڈ میک اپ آرٹسٹ شوریٰ خان سے دوسری شادکی ہے۔ دنوں کی ملاقات فلم ’پٹنہ شکلا‘ کے سیٹ پر ہوئی تھی۔
ارباز کی پہلی بیوی بالی وڈ کی مشہور ڈانسر ملائکہ اڑورہ تھیں جن سے انھوں نے 1998 میں شادی کی تھی جو 2017 میں ختم ہوگئی۔ ان کا ایک بیٹا ارحان خان ہے۔
