اسلام آباد: سیلز ٹیکس آڈٹ کیلیے فیڈرل بورڈ آف ریونیو (ایف بی آر) افسران کے اختیارات میں مزید اضافے کا ترمیمی فنانس بل منظور کر لیا۔
قومی اسمبلی سے منظور ہونے والے بل کے مطابق ایف بی آر کو سیلز ٹیکس آڈٹ کیلیے تمام ریکارڈ اور ڈیٹا حاصل کرنے کا اختیار ہوگا، آڈٹ کے دوران انفرادی حیثیت یا مجاز اتھارٹی کو پیش ہونا ہوگا۔
فنانس بل کے مطابق سیلز ٹیکس آڈٹ میں 6 سال سے پرانا ریکارڈ ایف بی آر نہیں طلب کر سکے گا، ٹیکس فراڈ پکڑنے کیلیے ایف بی آر میں ٹیکس فراڈ انویسٹی گیشن ونگ قائم کیا جائے گا جو فراڈ، تحقیقات اور ٹیکس چوری روکنے کیلیے کام کرے گا۔
اس میں کہا گیا کہ ونگ میں فراڈ انویسٹی گیشن، لیگل اور اکاؤنٹنٹس یونٹ قائم ہوں گے، چیف انویسٹی گیٹر کے ساتھ سینئر، جونیئر انویسٹیگیٹر و دیگر عملہ شامل ہوگا، سینئر فرانزک، سینئر ڈیٹا اینالسٹ و دیگر اسٹاف بھی ونگ میں شامل ہوگا۔
