اسلام آباد : تحریک انصاف کے چیئرمین عمران خان کی رہائش گاہ بنی گالہ کے باہر معروف گلوکار سلمان احمد کو پولیس اہلکاروں نے اپنی حراست میں لے لیا، اور ان کو گھسیٹتے ہوئے وین میں ڈال دیا۔
تفصیلات کے مطابق دو نومبر کو احتجاج کے حوالے سے جمع ہونے والے پی ٹی آئی کے کارکنان عمران خان کی رہائش گاہ بنی گالہ کے باہر موجود ہیں اور پولیس کی بھاری نفری بھی اسی مقام پر موجود ہے۔
اس دوران معروف گلوکار سلمان احمد اپنی گاڑی میں وہاں عمران خان سے ملاقات کیلیے پہنچے تو اہلکاروں نے انہیں گاڑی سے باہر نکلنے کو کہا وہ جیسے ہی اپنی گاڑی سے باہر نکلے تو تین سے چار پولیس اہلکاروں نے انہیں دبوچ لیا اور گھسیٹتے ہوئے پولیس وین میں ڈال دیا۔
بعد ازاں اے آر وائی سے خصوصی گفتگو کرتے ہوئے سلمان احمد نے بتایا کہ مجھے لے جانے کی کوئی وجہ نہیں بتائی گئی میں نے کہا میں عالمی سطح پر پہچانا جانا جانے والا فنکار ہوں میں نے دل دل پاکستان گا یا ہے۔
پولیس وین کا دروازہ اہلکاروں نے صحیح طرح سے بند نہیں کیا تھا، مجھے جیسے ہی موقع ملا میں وین سے نکل کر فرار ہونے مین کامیاب ہوگیا۔
انہوں نے بتایا کہ جب مجھے گرفتار کیا جارہا تھا تو میں نے پولیس اہلکاروں کو بتایا کہ میں انسداد پولیو مہم کا پاکستان میں ایمبیسیڈرہوں اوراس حوالے سے عمران خان سے ملاقات کیلیے جارہا ہوں لیکن انہوں نے میری ایک نہ سنی اور۔مجھے گرفتار کرلیا لیکن میں موقع ملتے ہی فرارہوگیا۔
سلمان احمد کا کہنا تھا کہ دو نومبر کوعوام کا سیلا ب آئے گا، سپریم کورٹ کے چیف جسٹس سے درخواست کروں گا کہ یہ دہشت گردی ہے اس کا نوٹس لیا جائے۔
