پاکستان ٹی 20 ٹیم کے کپتان سلمان علی آغا کا کہنا ہے کہ فینز ہم سے خوش نہیں، ٹیم نے امیدوں کے مطابق کرکٹ نہیں کھیلی۔
نیوزی لینڈ کے خلاف پہلے ٹی 20 میچ سے قبل کپتان سلمان علی آغا نے پریس کانفرنس کرتے ہوئے کہا کہ ایشیا کپ اور ٹی 20 ورلڈ کپ جیتنا ہدف ہے، نیوزی لینڈ کے خلاف سیریز جیتنے کی کوشش کریں گے۔
سلمان علی آغا نے کہا کہ ٹیم کی تیاری اچھی ہے اور وہ سیریز میں اچھی کارکردگی دکھانے کی کوشش کرے گی، یہ نوجوان ٹیم ہے اور سیریز میں بے خوف کرکٹ کھیلے گی۔
واضح رہے کہ پاکستان اور نیوزی لینڈ کے درمیان پہلا ٹی20 انٹرنیشنل اتوار کو کھیلا جائے گا۔
کرائسٹ چرچ میں کھیلا جانے والا میچ پاکستانی وقت کے مطابق صبح سوا 6 بجے شروع ہوگا۔
نیوزی لینڈ کے خلاف ٹی20 سیریز میں پاکستان ٹیم کی قیادت سلمان علی آغا کریں گے۔
سلمان علی آغا اس سے قبل زمبابوے کے خلاف سیریز میں قومی ٹیم کی قیادت کرچکے ہیں، وہ سیریز پاکستان نے 2-1 سے جیتی تھی۔
پاکستانی ٹیم نے کرائسٹ چرچ پہنچنے کے بعد کوچز کی نگرانی میں ٹریننگ سیشن میں حصہ لیا۔
