پاکستان ٹی ٹوئنٹی ٹیم کے کپتان سلمان علی آغا نے ساتھی کرکٹر اور قومی ٹیم کے سابق کپتان بابر اعظم کے ساتھ تعلقات اور انہیں انسٹاگرام پر اَن فالو کرنے کے حوالے سے سوشل میڈیا پر گردش کرتی افواہوں پر لب کشائی کی ہے۔
گزشتہ روز 3 ٹی ٹوئنٹی میچز کی سیریز کے آخری میچ میں پاکستان نے بنگلادیش کو 7 وکٹ سے ہرا کر کلین سوئپ کیا، پاکستان کے نوجوان کرکٹرز نے بنگلادیش کا 197 رنز کا ہدف 18ویں اوور میں 3 وکٹوں کے نقصان پر پورا کردیا۔
پاکستان کرکٹ ٹیم کے کپتان سلمان علی آغا نے میچ کے بعد پریس کانفرنس کرتے ہوئے کہا کہ خوشی بہت ہے نوجوان کرکٹرز نے پرفارم کیا، ہمیں دیکھنا یہ ہے کہ ہمیں کرکٹ کیسی کھیلنی ہے، فینز کو تفریح مہیا کرنی ہے۔
ٹی ٹوئنٹی ٹیم کے کپتان سلمان علی آغا نے بابر اعظم کو انسٹاگرام پر اَن فالو کرنے کے سوال پر جواب دیتے ہوئے کہا کہ میں نے بابر اعظم کو انسٹاگرام پر کبھی فالو ہی نہیں کیا تو اَن فالو کیا کرنا ہے، لوگ ایسی ہی باتیں کرتے رہتے ہیں۔
سلمان نے انکشاف کیا کہ بابر میرا 2008 سے اسکول کا دوست ہے، تب تو اتنا سوشل میڈیا بھی نہیں تھا، ہم یہ ساری چیزیں دیکھ کر صرف ہنستے ہی ہیں۔ بس لوگوں کا خیال ہے کہ میں نے بابر کو اَن فالو کر دیا، ایسا کچھ نہیں ہے، میں نے میچ سے پہلے بابر سے بات کی تھی۔
سلمان کا بنگلادیش کے خلاف میچ سے متعلق بات کرتے ہوئے کہنا تھا کہ جب تک میں کپتان ہوں، ہمیں ایسے ہی کرکٹ کھیلنی ہے، ہمیں بولروں اور بلے بازوں کو انڈر پریشر رکھنا ہے، ہماری کوشش یہی ہے کہ مین ٹیم یہی رہے لیکن کوئی بھی ٹیم میں واپس آ سکتا ہے سب کے لیے دروازے کھلے ہیں۔
خود کو ناکام کپتان سمجھوں گا اگر۔۔۔ سلمان علی آغا نے صائم اور حارث سے متعلق کیا کہا؟
انہوں نے کہا کہ پی ایس ایل سے بھی کھلاڑی آ رہے ہیں، محمد حارث نے پوری سیریز میں اچھا کھیلا، ہم ڈومیسٹک کو بھی عزت دیں گے اور اس پرفارمنس کی بھی اہمیت رہتی ہے۔
