کراچی : ہاکی کے نامور پاکستانی کھلاڑی (صدارتی تمغہ برائے حسن کارکردگی) سمیع اللہ خان نے کہا ہے کہ ہمارے زمانے میں کرکٹ سے زیادہ ہاکی کھیلی اور دیکھی جاتی تھی۔
اے آر وائی نیوز کے پروگرام ہمارے مہمان میں ہاکی لیجنڈ ’’سمیع اللہ خان‘‘ کی اہلیہ ’’یاسمین سمیع اللہ‘‘ سے میزبان فضہ شعیب نے دلچسپ سوالات کیے۔
سمیع اللہ خان نے کہا کہ مجھے شہر کراچی بہت پسند ہے کیوں کہ جو بھی اس شہر میں آتا ہے وہ پھر بھوکا نہیں سوتا سال 1974 میں کسٹم میں ملازمت کے حوالے سے کراچی منتقل ہوا تھا۔
انہوں نے بتایا کہ جن دنوں میری شادی ہوئی اس وقت میں قومی ہاکی ٹیم کا کپتان تھا جس میں سے میرے کیئریر میں قومی ٹیم نے بمشکل 5 یا 6میچز ہارے ہوں گے۔
تعلق کراچی سے ہے لیکن زیادہ تر وقت کراچی میں گزرا۔ میں نے 165 میچز کھیلے جبکہ میں نے 68 گول کیے، اب میں کبھی کبھی ہاکی کلب آکر بچوں کو کوچنگ دیتا ہوں۔
اس موقع پر سمیع اللہ خان کی اہلیہ یاسمین سمیع اللہ نے بھی سوالات کے دلچسپ جوابات دیئے، ان کا کہنا تھا کہ سیاست میرے خاندان کا اوڑھنا بچھونا ہے۔ انہوں نے بتایا کہ میں وزیر اعظم کی بہت بڑی مداح ہوں باقاعدہ سیاست میں تو نہیں لیکن پی ٹی آئی کو ہی سپورٹ کرتی ہوں۔
یاسمین سمیع اللہ کا کہنا تھا کہ میرا عمران خان کیلئے یہ پیغام ہے کہ ہاکی کے ایک قیمتی کھلاڑی کی صلاحیتوں سے آپ ان کا فائدہ نہیں اٹھا رہے، ہاکی آج اسی لیے پیچھے ہے۔
