ماہ رمضان کی آمد کے ساتھ ہی بازاروں میں بڑی تعداد میں مضر صحت سموسہ رول پٹی اور غیر معیاری فروزن چیزوں کی تیاری اور فروخت عروج پر پہنچ جاتی ہے۔
ان اشیاء کی تیاری کس طرح کی جاتی ہے اور کس طرح اس میں حفظان صحت اصولوں کو بالائے طاق رکھ کر شہریوں کی زندگیوں سے کھلواڑ کیا جاتا ہے۔
اس حوالے سے اے آر وائی نیوز کے پروگرام سرعام کی ٹیم نے پنجاب فوڈ اتھارٹی کے عملے کے ہمراہ لاہور میں چوک یتیم خانہ کے عقب میں واقع ایک مخدوش سی عمارت میں کارروائی کی جہاں اسی طریقے سے سموسہ رول پٹی تیار کی جارہی تھی۔
ٹیم سرعام اور پی ایف اے کا عملہ جب اس گھر کے اندر پہنچا تو دیکھا کہ یہاں بہت بڑے پیمانے پر کام ہورہا تھا، 40 سے 50 ملازمین سموسہ رول پٹی کی تیاری میں مصروف عمل تھے اور صفائی ستھرائی کی صورتحال انتہائی قابل اعتراض تھی اور ملازمین بدبودار ماحول میں کام کررہے تھے۔
یہاں کی دیواروں پر مکڑی کے جالے اور سامان پر بے تحاشا مکھیاں بیٹھی تھیں، سموسہ رول پٹی کیلیے میدہ پیروں کی مدد سے گوندھا جا رہا تھا، پٹیوں میں استعمال ہونے والی روٹی کی تیاری کیلیے جو گھی رکھا ہوا تھا اس میں کیڑے مکوڑے اور دیگر حشرات الارض گرے ہوئے تھے۔
اس موقع پر کارخانے کے منیجر شاہ زیب نے ساری صورتحال کے سامنے آنے پر اپنی غلطی کا برملا اعتراف کیا۔ بعد ازاں پنجاب فوڈ اتھارٹی نے اس فیکٹری پر 3 لاکھ روپے جرمانہ عائد کرکے اس کو سیل کردیا۔
