لاہور : وزیراطلاعات پنجاب صمصام علی بخاری نے کہا مشرف کے بلدیاتی سسٹم نے زیادہ بہتر طور پر ڈلیور کیا، بلدیاتی نظام مضبوط ہوتا تو اسمبلیوں پر کرپشن کے نشان نہ ہوتے۔
تفصیلات کے مطابق وزیراطلاعات پنجاب صمصام علی بخاری نے میڈیا سے گفتگو میں کہا نوازلیگ اور پی پی نے کبھی بلدیاتی نظام میں دلچسپی نہیں لی، مشرف کے بلدیاتی سسٹم نے زیادہ بہتر طور پر ڈلیور کیا، بلدیاتی نظام مضبوط ہوتا تو اسمبلیوں پر کرپشن کے نشان نہ ہوتے۔
صمصام بخاری کا کہنا تھا پنجاب میں تاریخ کا بہترین لوکل باڈیز سسٹم لارہے ہیں ، اپوزیشن جماعتیں ہر قیمت پر اپنی کرپشن بچانا چاہتی ہیں، پی ٹی آئی شفاف بلدیاتی نمائندے سامنے لائےگی۔
وزیراطلاعات پنجاب نے کہا پنچائت سسٹم اورنیبرہڈ کونسلز مکمل با اختیار ہوں گی، نیا بلدیاتی سسٹم کسی لحاظ سے آڈٹ سے مبرا نہیں ہوگا، چیک اینڈ بیلنس یقینی بنائیں گے، کوئی انگلی نہیں اٹھا سکے گا۔
ان کا کہنا تھا حکومت درپیش مسائل سےمؤثر انداز سے نمٹ رہی ہے، رمضان میں کسی کو مہنگائی کی اجازت نہیں دیں گے، وزراکی ڈیوٹیاں لگ گئی ہیں، کوتاہی پر انتظامیہ ذمہ دارہوگی۔
صمصام بخاری نے کہا رمضان میں ہرضلع کےاچانک دورے ہوں گے،موقع پر کارروائی ہوگی، شہریوں کی سہولت کیلئے دکاندار اور تاجر بھی اپنا فرض ادا کریں۔
یاد رہے کہ 30 اپریل کو پنجاب اسمبلی میں نئے بلدیاتی نظام کا قانون منظورکرلیا گیا تھا، اپوزیشن نے بل کی منظوری کے خلاف ایوان میں احتجاج کیا تھا، نئے بلدیاتی نظام کے تحت ویلج کونسل اور شہروں میں محلہ کونسل کا انتخاب غیرجماعتی بنیادوں پر ہوگا۔
مزید پڑھیں : پنجاب بھر میں نیا بلدیاتی نظام نافذ، ایڈمنسٹریٹر تعینات، نوٹی فکیشن جاری
بعد ازاں گورنر پنجاب چوہدری سرور نے لوکل گورنمنٹ بل 2019 پر دستخط کیے تھے، جس کے بعد نیا بلدیاتی نظام صوبے میں نافذ ہوگیا، نئے بلدیاتی نظام کے تحت پنجاب کےبلدیاتی ادارےایڈمنسٹریٹرز چلائیں گے جن کی معیاد ایک سال تک ہوگی۔ لوکل گورنمنٹ بل منظور ہوتے ہی مسلم لیگ ن کے ہاتھ سے لوکل گورنمنٹ بھی نکل گئی۔
نئے بلدیاتی الیکشن آئندہ سال ہوں گے جب تک شہروں میں میونسپل اور محلہ کونسل جبکہ دیہات میں تحصیل اور ویلج کونسل ایڈمنسٹریٹرز کے تحت کام کریں گی۔
