سان فرانسسکو: اسمارٹ فون بنانے والی معروف کمپنی سام سنگ نے پہلا فولڈ ایبل موبائل متعارف کرادیا۔
تفصیلات کے مطابق گزشتہ دنوں اطلاع سامنے آئی تھی کہ دیگر موبائل کمپنیوں پر سبقت لے جانے کے لیے اس بار سام سنگ کمپنی ایک نئے اور جدید انداز کا اسمارٹ فون متعارف کرانے کا ارادہ رکھتی ہے۔
موبائل فونز پر نظر رکھنے والی غیر ملکی ویب سائٹ نے دعویٰ کیا تھا کہ سام سنگ کا نومبر میں آنے والا اسمارٹ فون فولڈ ایبل (مڑنے) کی سہولت سے آراستہ ہوگا جسے کتاب کی طرح بند کیا جاسکے گا اور سب سے دلچسپ بات یہ ہے کہ اس فون میں 2 اسکرینز ہوں گی۔
اب صارفین کے انتظار کی گھڑیاں ختم ہوئیں کیونکہ سام سنگ نے کتاب کی طرح فولڈ ہونے والا موبائل فون متعارف کرادیا جسے ’انفنیٹی فلیکس ڈسپلے‘ کا نام دیا گیا ہے۔
سام سنگ نے اس فون کی اسکرین لچکدار رکھی جبکہ اس کا سائز 7.3 انچ ہے، اسمارٹ ڈیوائس کو کتاب کی طرح بند کیا جاسکتا ہے جبکہ یہ کھل کر ٹیبلیٹ کی شکل اختیار کرلیتا ہے۔
مزید پڑھیں: سام سنگ کے متوقع فون کی تصویر لیک
فولڈ ہونے کے بعد فون کی اسکرین عام موبائلز کی طرح کام کرتی ہے جسے جیب میں آسانی سے رکھا جاتا ہے۔
کمپنی نے فون سے متعلق دیگر معلومات فراہم نہیں کیں جبکہ یہ اعلان کیا گیا ہے کہ عام صارفین کے لیے مارکیٹ میں اسے جلد پیش کیا جائے گا۔
سام سنگ کے ترجمان پہلے ہی اشارہ دے چکے تھے کہ نومبر میں ہونے والی سالانہ سام سنگ ڈؤیلپر کانفرنس میں کمپنی اب تک کا سب سے منفرد سیٹ متعارف کرائے گی۔
یہ بھی پڑھیں: پہلا فولڈ ایبل موبائل فون متعارف
یاد رہے کہ گزشتہ ماہ سام سنگ کے چیف ایگزیکٹو آفیسر کا کہنا تھا کہ ’ہم فولڈ ایبل فون متعارف کرانے کا ارادہ رکھتے ہیں جو اس سال کے آخر تک سامنے آئیں گے‘۔
واضح رہے کہ سانس فرانسسکو میں 7 نومبر سے تین روزہ ڈؤیلپر کانفرنس کا انعقاد کیا جارہا ہے جس میں سام سنگ کے نئے موبائل اور دیگر اشیاء متعارف کرائی جائیں گی۔
