اسلام آباد : ٹک ٹاکر ثنا یوسف قتل کیس میں بڑی پیش رفت ہوئی، عدالت نے ملزم عمر حیات کو 14 روزہ جوڈیشل ریمانڈ پر جیل بھیج دیا۔
تفصیلات کے مطابق اسلام آباد کے جوڈیشل مجسٹریٹ نے ٹک ٹاکر ثنا یوسف قتل کیس کی سماعت کی ، ملزم کو جوڈیشل مجسٹریٹ کی عدالت میں پیش کیا گیا۔
متعلقہ عدالت کے پراسیکیوٹر،ڈسٹرکٹ پراسیکیوٹر عدالت سے غیرحاضر تھے، جس پر ڈیوٹی مجسٹریٹ احمدشہزاد گوندل نے ڈیوٹی پراسیکیوٹرز پر اظہار برہمی کیا۔
جوڈیشل مجسٹریٹ نے کہا کہ میری عدالت کے پراسیکیوٹر کہاں ہیں؟ ڈسٹرکٹ پراسیکیوٹر کو کمرہ عدالت میں بلائیں، جس پر ڈیوٹی پراسیکیوٹر کا کہنا تھا کہ پراسیکیوٹر چھٹیوں پر ہیں۔
جوڈیشل مجسٹریٹ نے کہا کہ ڈسٹرکٹ پراسیکیوٹر آئے گا تو کیس چلےگا۔
مزید پڑھیں : ثناء یوسف کو کیوں قتل کیا گیا ، ملزم کون ہے؟ تفصیلات سامنے آگئیں
تفتیشی افسرکی جانب سے ملزم کو شناخت پریڈ کیلئے جوڈیشل لاک اپ میں بھیجنے کی استدعاکی گئی، جس پر عدالت نے ملزم عمرحیات کی شناخت پریڈ کی درخواست منظور کرلی۔
عدالت نے ملزم عمرحیات کو شناخت پریڈ کیلئے 14 روزہ جوڈیشل ریمانڈپرجیل بھیج دیا گیا۔
عدالت نے سپرنٹنڈنٹ اڈیالہ جیل کو ہدایت کی کہ وہ شناخت پریڈ کیلئے اقدامات کریں اور شناخت پریڈ تک کسی سے ملاقات نہ کرائی جائے۔
جوڈیشل مجسٹریٹ نے تفتیشی افسر کو شناخت پریڈکی رپورٹ 18جون سے پہلے جمع کرانے کی ہدایت کردی۔
یاد رہے اسلام آباد میں گھر میں گھس کر 17 سالہ ٹک ٹاکر ثناء یوسف کو قتل کرنے والے 22 سالہ ملزم عمر حیات عرف کاکا کو پولیس نے کارروائی کرتے ہوئے گرفتار کرلیا تھا۔
پولیس کے مطابق ملزم ثناء سے دوستی کرنا چاہتا تھا لیکن وہ انکار کررہی تھی تو ملزم نے طیش میں آکر گولیاں مار دیں۔
آئی جی اسلام آباد ناصر رضوی نے بتایا تھا کہ سوشل میڈیا انفلوئنسر ثناء یوسف سے لڑکا بار بار رابطہ کرنے کی کوشش کررہا تھا اور وہ بار بار اس کی دوستی کو مسترد کررہی تھیں۔
