اسلام آباد : آئی جی اسلام آباد علی ناصر رضوی نے ثنا یوسف کے قتل میں ملوث ملزم کی تفصیلات شیئر کرتے ہوئے قتل کی وجہ بھی بتادی۔
تفصیلات کے مطابق آئی جی اسلام آباد علی ناصر رضوی نے پریس کانفرنس کرتے ہوئے کہا کہ ٹک ٹاکر ثنا یوسف کےقتل سے تشویش کی لہر دوڑی، ٹک ٹاکر کو 2 گولیاں ماری گئیں، نامعلوم ملزم فائرنگ کے بعد فرار ہوگیا تھا۔
علی ناصر رضوی کا کہنا تھا کہ ٹک ٹاکر ثنا یوسف کے قتل کیس میں 7 ٹیمیں بنائی گئیں ، ثنا کےقاتل کی گرفتاری چیلنج تھا، اسلام آباد سیف سٹی اور پرائیوٹ 113 کیمرے کی ویڈیوز حاصل کی گئیں، قتل کیس کی تحقیقات کیلئے 300 سے زائد کالز کا جائزہ لیا گیا۔
انھوں نے بتایا کہ ثنا یوسف کا موبائل فون جائے وقوع پر موجود نہیں تھا، قاتل نے آئی فون غائب کیا تاکہ کوئی ثبوت نہ مل سکے۔
آئی جی اسلام آباد نے مزید بتایا کہ ثنایوسف قتل کیس میں 37لوگوں سے تفتیش کی گئی، اسلام آباد،فیصل آباد سمیت مختلف شہروں میں 11 چھاپے مارے۔
مزید پڑھیں : ثنا یوسف کیس: مرکزی ملزم گرفتار
انھوں نے ملزم کی تفصیلات بتاتے ہوئے کہا کہ مرکزی ملزم عمر 22سال کا لڑکا ہے جسے فیصل آباد سے گرفتارکیاگیا، ملزم عمر میٹرک پاس ہے ،اسلحہ اور مقتولہ کا آئی فون برآمد کیا۔
ان کا ٹک ٹاکر لڑکی کے قتل کی وجہ کے حوالے سے کہنا تھا کہ ملزم عمر مقتولہ ثنایوسف کو باربار رابطے کی کوشش کررہاتھا، وہ دوستی کرنا چاہتاتھا لیکن ثنا یوسف نے باربار اسے مسترد کیا، ملزم ثنا یوسف کےگھر تک پہنچا اور باربار کوشش کی کہ ملاقات ہوسکے۔
انھوں نے کہا کہ ملزم پہلے بھی 7سے 8 گھنٹے تک ملاقات کی کوشش کرتا رہا، گذشتہ روز ملزم عمر مقتولہ کے گھر کےاندر گھسا اور فائرنگ کی۔
