لاس اینجلس: اسٹیو جابز کے استعمال کردہ چپل ایک نیلامی میں 2 لاکھ سے زائد ڈالرز میں فروخت ہو گئے۔
میڈیا رپورٹس کے مطابق 1970 کی دہائی کے وہ سینڈل جو اسٹیو جابز نے پہنے تھے، ایک نیلامی میں 218 ہزار ڈالرز میں نیلام ہو گئے۔
اسٹیو جابز نے کیلیفورنیا میں اپنے جس گھر میں ایپل کی مشترکہ بنیاد رکھی تھی، اب ایک تاریخی مقام کی حیثیت حاصل کر چکا ہے، اس گھر کے فرش پر چلتے ہوئے اسٹیو جابز نے جو چپل پہنے تھے، وہ اب تقریباً 220,000 ڈالر میں فروخت ہو گئے ہیں۔
جولینز آکشنز نے اتوار کو کہا کہ یہ چپل ’اچھی طرح‘ سے استعمال شدہ ہیں، یہ براؤن رنگ کے سابر چپل ہیں جو برکن اسٹاکس نے بنائے تھے، اور ان چپلوں کے لیے ادا کی گئی رقم اب تک کسی چپلوں کے جوڑے کے لیے ادا کی جانے والی سب سے زیادہ رقم ہے۔
نیلام گھر نے اپنی ویب سائٹ پر بتایا کہ کارک اور جوٹ کے فُٹ بیڈ پر اسٹیو جابز کے پیروں کا نقش ابھی تک برقرار ہے، جو برسوں کے استعمال کی وجہ سے پڑ گیا تھا۔
جولینز نے کہا کہ انھیں یہ سینڈل 60,000 ڈالرز میں نیلام ہونے کی توقع تھی، تاہم NFT (نان فنجیبل ٹوکن) کے ساتھ اس کی حتمی فروخت کی قیمت 218,750 ڈالر نکلی۔ یہ چپل کس نے خریدے ہیں، اس سلسلے میں کمپنی کی جانب سے کچھ نہیں بتایا گیا۔
یاد رہے کہ جابز اور اسٹیو ووزنیاک نے 1976 میں لاس آلٹوس، کیلیفورنیا میں جابز کے والدین کے گھر پر ایپل کی مشترکہ بنیاد رکھی تھی، 2013 میں اس پراپرٹی کو لاس آلٹوس ہسٹوریکل کمیشن نے ایک تاریخی علامت قرار دے دیا تھا۔
جابز 2011 میں لبلبے کے کینسر کی پیچیدگیوں کی وجہ سے انتقال کر گئے تھے۔
