نئی دہلی: بھارتی ٹینس اسٹار اور قومی کرکٹر شعیب ملک کی اہلیہ ثانیہ مرزا نے کورونا میں مبتلا ہونے کے بعد آئسولیشن میں جانے اور گھر والوں سے دور رہنے کے اپنے دردناک تجربے کو شیئر کردیا۔
بھارتی ٹینس اسٹار اور قومی کرکٹر شعیب ملک کی اہلیہ ثانیہ مرزا نے سماجی رابطے کی ویب سائٹ انسٹاگرام پر بیٹے کے ہمراہ ایک تصویر شیئر کی جس میں وہ اذہان کو پیار کررہی ہیں۔
ثانیہ مرزا نے تصویر کے ساتھ کیپشن لکھا کہ میں کورونا وائرس میں مبتلا ہوگئی تھی اب رب باری تعالیٰ کی مہربانی سے بالکل ٹھیک ہوں، یہاں اپنا تجربہ شیئر کرنا چاہتی ہوں۔
انہوں نے لکھا کہ میں خوش قسمت ہوں کہ کورونا سے متعلق بڑی علامات سامنے نہیں آئیں لیکن میں نے تنہائی اختیار کی جس میں مشکل ترین وقت اپنے دو سالہ بیٹے اذہان اور اہلخانہ سے دوری تھا۔
ثانیہ مرزا نے کہا کہ میں تصور نہیں کرسکتی جس طرح کورونا سے متاثرہ افراد اور ان کے اہلخانہ اذیت سے گزرتے ہیں جب کوئی بیمار ہوکر اسپتال میں اکیلا ہوتا ہے اور صرف خود پر ہی انحصار کررہا ہوتا ہے، اس اکیلے پن میں آپ میں روزانہ نئی علامات سامنے آتی ہیں اور بے چینی بڑھ جاتی ہے، ایسے میں آپ کے لیے اس بیماری کو جھیلنا نہ صرف جسمانی طور پر بلکہ ذہنی اور جذباتی طور پر بھی مشکل ہوجاتا ہے۔
ٹینس اسٹار نے لکھا کہ میں یہاں کہنا چاہتی ہوں کہ میں ان سب چیزوں کے باوجود ٹھیک ہوں لیکن اپنے اہلخانہ سے دوری سب سے زیادہ خوفناک چیز تھی یہ جاننے کے لیے آخر ہم کب انہیں دوبارہ دیکھیں گے۔
ثانیہ مرزا نے کہا کہ یہ وائرس مذاق نہیں ہے، میں نے اس سے بچاؤ کی تمام احتیاطی تدابیر اختیار کیں لیکن پھر بھی کورونا میں مبتلا ہوگئی۔
انہوں نے مداحوں سے کہا کہ ہمیں خود کو اہلخانہ کو اور دوستوں کو محفوظ رکھنے کے لیے سب کچھ کرنا ہوگا، ماسک پہنیں، بار بار ہاتھ دھوئیں، اپنا اور اپنے پیاروں کا خیال رکھیں۔
