حیدرآباد میں بھارتی ٹینس اسٹار ثانیہ مرزا کی بہن انعم کے دعوتِ رمضان ایکسپو میں فائرنگ کرنے والے شخص کو پولیس نے گرفتار کرلیا۔
بھارت کی اسٹار ٹینس پلیئر ثانیہ مرزا کی بہن انعم مرزا کی جانب سے کنگز پیلس میں دعوتِ رمضان ایکسپو کا اہتمام کیا گیا تھا جس میں دو افراد کے درمیان جھگڑا اس وقت شدت اختیار کرگیا جب واقعے کے دوران محفل میں مبینہ طور پر ایک جانب سے فائرنگ کردی گئی۔
میڈیا رپورٹس کے مطابق مذکور واقعہ ہفتہ 29 مارچ کو پیش آیا، اس میں ایک شخص کو دو افراد کے درمیان جھگڑے کے دوران مبینہ طور پر دو راؤنڈ فائرنگ کرتے ہوئے دیکھا گیا۔
فائرنگ کی اطلاع ملنے پر پولیس نے فوری کارروائی کرتے ہوئے ملزم کو گرفتار کر کے فائرنگ کرنے کے لیے استعمال ہونے والا اسلحہ برآمد کرلیا۔
گودی ملکاپور پولیس اسٹیشن کے انسپکٹر نے بتایا کہ ایکسپو میں پرفیوم شاپ کے مالک اور کھلونوں کی دکان کے مالک ک ے درمیان معمولی جھگڑا ہوا تھا،
انسپکٹر نے بتایا کہ ان دو اشخاص کے درمیان جھگڑے میں بعدازاں سمجھوتہ ہوگیا، اس درمیان ملزم حسیب الدین نے اپنے لائسنس یافتہ پستول سے غیر ضروری طور پر ہوا میں دو راؤنڈ فائر کیے۔
پولیس نے بتایا کہ حیران کن بات یہ ہے کہ ملزم حسیب الدین عرف حیدر کا نہ تو پرفیوم کی دکان کے مالک سے اور نہ ہی کھلونوں کی دکان کے مالک سے کوئی تعلق تھا۔
