کراچی: شہر میں عید کے دوسرے روز بھی آلائشیں اٹھانے کا کام تاخیر کا شکار ہوا اور گلی محلوں میں آلائشیں پڑی رہنے سے سخت تعفن پھیل رہا ہے۔ دوسری جانب کئی علاقوں میں بعض انتظامی اہلکار آلائشیں اٹھانے کے لیے رقم کا مطالبہ کر رہے ہیں۔
تفصیلات کے مطابق کراچی کی سڑکوں پر آلائشوں کی بھر مار ہے۔ عید کے دوسرے روز بھی قربانی کی آلائشیں ٹھکانے لگانے کا مناسب بندوست نظر نہیں آرہا۔
عید کے روز قربانی کے بعد کراچی میں جا بجا آلائشوں کے ڈھیر لگ گئے۔ گلیاں اور شاہراہیں آلائشوں سے اٹ گئیں۔ حسب معمول ایسی صورتحال میں انتظامیہ غائب ہوگئی۔ غلاظت اور تعفن نے شہریوں کا جینا محال کر دیا۔
عید کے پہلے روز قربانی کے بعد شہر بھر میں آلائشوں کو اب تک ٹھکانے نہیں لگایا جاسکا۔ پوش علاقوں میں انتظامیہ حرکت میں نظر آئی لیکن دیگر علاقوں میں آلائشوں کی بھرمار ہے۔
کئی علاقوں میں لوگوں کی جانب سے شکایت موصول ہوئی کہ بعض انتظامی اہلکار آلائشیں اٹھانے کے لیے رقم کا مطالبہ کر رہے ہیں۔
عید کے دوسرے روز بھی دن کے آغاز کے ساتھ ہی قربانی کا سلسلہ شروع ہوگیا جس کے باعث آلائشوں میں اضافہ ہو رہا ہے لیکن انہیں ٹھکانے لگانے کا مناسب بندوبست تاحال نظر نہیں آرہا۔
