سابقہ اداکارہ و ماڈل سارہ چوہدری نے اچانک شوبز انڈسٹری چھوڑنے کی وجہ بتادی۔
سابقہ اداکارہ سارہ چوہدری نے 2002 میں اپنی کیرئیر کا آغاز کیا اور 2010 میں انہوں نے اس شوبز انڈسٹری سے کنارہ کشی اختیار کرلی، شوبز چھوڑنے کے بعد انہوں نے الہدیٰ انسٹی ٹیوٹ میں شمولیت اختیار کی اور اپنی زندگی مذہب کی تبلیغ کے لیے وقف کردی۔
سارہ نے حال ہی میں ایک نجی پوڈ کاسٹ میں شرکت کی جہاں انہوں نے شوبز انڈسٹری سے دوری اختیار کرنے سے متعلق گفتگو کی۔
View this post on Instagram
شوبز انڈسٹری کو ہمیشہ کیلئے خیرباد کہہ کر مذہب اسلام کی طرف راغب ہونے سے متعلق سوال کا جواب دیتے ہوئے کہا کہ میرے والدین ہمیشہ اسلام کی طرف مائل رہے اور وہ نماز اور قرآن پڑھنے پر زور دیتے تھے، میرے والد نماز کے حوالے سے کافی سخت تھے جو مجھ سے ہمیشہ نماز کے بارے میں پوچھا کرتے تھے۔
سارہ چوہدری نے کہا کہ ’میں بہت مذہبی رجحان رکھتی تھی اور ہدایت کے لیے دعا مانگتی تھی، میں چاہتی تھی کہ اللہ تعالیٰ مجھے ایسی شخصیت میں ڈھال دے جس کی وہ خواہش کرتا ہے‘۔
انہوں نے کہا کہ مجھے احساس ہوا کہ حقیقی رہنمائی آپ کی زندگی کو اللہ کی مرضی سے ہم آہنگ کرنے کے بعد آتی ہے، میرے کیریئر کے دوران ایک اور واقعہ میری رہنمائی کا باعث بنا۔
’’میری جوان خالہ 38 سال کی عمر میں انتقال کر گئیں جس کے بعد میں نے شوبز انڈسٹری چھوڑنے کا فیصلہ کیا، یہ میرے لیے حیران کن تھا، میرے خاندان کی طرف سے عائد پابندیوں نے بھی میری روحانی تبدیلی میں حصہ لیا، سارہ چوہدری کی حیثیت سے مجھے اپنے دوستوں کے ساتھ باہر جانے کی اجازت نہیں تھی۔ یہ پابندیاں میرے لیے ایک نعمت تھیں، جس سے میرے روحانی سفر میں مدد ملی‘‘۔
View this post on Instagram
سارہ نے مزید کہا کہ میں کبھی بھی میڈیا انڈسٹری کی جدیدیت کی زیادہ گہرائی میں نہیں اتری، میں نے اپنے والدین کی مدد کے لیے شوبز میں شمولیت اختیار کی میں چاہتی تھی کی میرے والد کے پاس گھر اور بنیادی سہولیات ہوں۔
انہوں نے بتایا کہ ’میرے والد کے دوست نے مجھے ماڈلنگ کی کچھ ذمہ داریاں دیں جس کے بعد میں نے شوبز کو بطور کیریئر اپنایا، لیکن میں ہر وقت اپنے والدین کے ساتھ رہتی تھی اور وہ میری حفاظت کرتے تھے‘۔
