لندن : دس سالہ بچی سارہ شریف قتل کیس کی سماعت آج لندن کی اولڈ بیلی ہائی کورٹ میں ہوگی، نامزد ملزمان مقتولہ کے والد، سوتیلی والدہ اور چچا عدالت میں پیش ہوں گے۔
سارہ قتل کیس کی سنوائی آج صبح سے شروع ہوگی، مذکورہ مقدمہ میں والد عرفان شریف، سوتیلی ماں بینش بتول اور چچا فیصل ملک عدالت میں پیش ہوں گے، 14 اکتوبر کو مقدمہ جیوری کے سامنے پیش کیا جائے گا۔
غیر ملکی خبر رساں ادارے کی رپورٹ کے مطابق یہ مقدمہ ہائی کورٹ کے جج جسٹس کیواناگ کی سربراہی میں سنا جائے گا اور اس کی مدت تقریباً سات ہفتوں تک متوقع ہے۔
گزشتہ سماعت میں عدالت کو بتایا گیا تھا کہ پولیس کو 10 اگست کی رات 2:47 پر پاکستان سے 8منٹ اور 34 سیکنڈ کی ایک کال موصول ہوئی جس کے بعد سارہ کی لاش ملی تھی۔
نامزد ملزمان کو پاکستان سے واپس برطانیہ آنے پر گرفتار کیا گیا اور تینوں ملزمان پر15ستمبر2023کو فرد جرم عائد کی گئی تھی۔
یاد رہے کہ دس سالہ سارہ شریف گزشتہ سال اگست میں ووکنگ میں اپنے گھر سے مردہ حالت میں ملی تھی، ملزمان واقعہ کے بعد اچانک پاکستان فرار ہوگئے تھے۔
سارہ کے بارے میں پولیس کو فون کے ذریعےپاکستان سے اطلاع دی گئی تھی، پوسٹ مارٹم رپورٹ میں سارہ کے جسم پرتشدد کے واضح نشانات تھے۔
سارہ کی موت کی وجوہات کا رپورٹ میں تعین نہیں کیا جاسکا جبکہ تینوں ملزمان نے صحت جرم سے انکار کیا ہے۔
