چیمپئنز ون ڈے کپ میں ڈولفنز کے وکٹ کیپر بیٹر سرفراز احمد کی بابر اعظم سے متعلق کی گئی گفتگو سوشل میڈیا پر وائرل ہوگئی۔
فیصل آباد کے اقبال اسٹیڈیم میں اسٹالینز اور ڈولفنز کی ٹیمیں مدمقابل ہیں، اسٹالینز نے مقررہ اوورز میں 7 وکٹوں کے نقصان پر 271 رنز بنائے ہیں، بابر اعظم نے 100 گیندوں پر 104 رنز کی دلکش اننگز کھیلی۔
بابر اعظم کی شاندار اننگ میں 7 چوکے اور تین بلند و بالا چھکے شامل تھے۔
واضح رہے کہ بابر اعظم نے ڈومیسٹک کیریئر کے 184 میچز میں 55.13 کی اوسط سے 8766 رنز بنارکھے ہیں۔
تاہم ڈولفنز کے وکٹ کیپر بیٹر و سابق کپتان سرفراز احمد کی اسٹمپ مائیک میں بابر اعظم سے متعلق کی گئی گفتگو نے لوگوں کی توجہ حاصل کرلی۔
ویڈیو میں دیکھا جاسکتا ہے کہ بابر اعظم نان اسٹرائیکر اینڈ پر موجود ہیں، اس دوران سرفراز احمد کہتے ہیں کہ ’ٹھیک ہے، جلدی نہیں ہے، بس ان لوگوں کو بولو ’بابر بابر‘ کرتے رہیں ہم بابر کو 40 اوورز کھلا دیں گے۔
واضح رہے کہ ایسا پہلی بار نہیں ہے کہ سرفراز احمد کی دوران میچ گفتگو سوشل میڈیا پر وائرل ہوئی ہے اس سے قبل بھی وہ چیمپئنز ون ڈے کپ میں کپتان سعود شکیل کو ہدایت دے رہے تھے جو سوشل میڈیا پر وائرل ہوگئی تھی۔
