کوئٹہ: قلمدان واپس لینے پر سردار صالح بھوتانی نے صوبائی وزیر کی حیثیت سے استعفیٰ دے دیا ہے، گورنر بلوچستان نے صالح بھوتانی کا استعفیٰ منظور کرلیا ہے۔
ترجمان گورنرہاؤس بلوچستان کی جانب سے جاری بیان میں کہا گیا کہ سردار محمدصالح بھوتانی نے صوبائی وزیر کی حیثیت سے استعفیٰ دے دیا ہے، انہوں نے آج اپنا استعفیٰ گورنربلوچستان کو پیش کیا۔
ترجمان گورنرہاؤس کے مطابق گورنربلوچستان نےسردار محمدصالح بھوتانی کا استعفیٰ منظور کرلیا ہے۔
صالح بھوتانی کی پریس کانفرنس
صوبائی کابینہ سے مستعفی ہونے کے بعد بلوچستان عوامی پارٹی کے رہنما سردار صالح بھوتانی نے پریس کانفرنس کی اور صوبائی حکومت کو شدید تنقید کا نشانہ بنایا، صالح بھوتانی نے کہا کہ میں نےبطور صوبائی وزیر استعفی دے دیا ہے، استعفیٰ دینےکا مقصد ہےاس گناہ میں اور زیادہ شریک نہیں ہوسکتا۔
صالح بھوتانی نے دعویٰ کیا کہ اور بھی دوستوں سے رابطےہیں مزیداستعفےآسکتےہیں، مستعفی صوبائی وزیر کا کہنا تھا کہ جب وزیراعلیٰ براہ راست پٹواری تک بات کرتاہےتو وزیر کی کیا حیثیت کیا عزت؟وزیراعلیٰ بلوچستان جام کمال خان میں بروقت فیصلےکی قوت نہیں ہے۔
سردار صالح بھوتانی نے کہا کہ موجودہ صوبائی حکومت جسے جام حکومت کہتےہیں اس کا میں بھی حصہ تھا، عبدالقدوس بزنجو کےدور میں بنائے گئے بجٹ کوجام صاحب نے مسترد کیا،جام صاحب کی وجہ سےبلوچستان ترقیاتی منصوبوں سےمحروم رہا۔
سردار صالح بھوتانی نے بتایا کہ ہمیں بتایا جاتا رہا کہ پہلے سال پھر دوسرے سال اسکیموں کا آغاز ہوگا، دوسرا سال گزرنے کے باوجود چند ایک کے سوا کوئی اسکیم شروع نہ ہوسکی، مجھ سمیت حکومت میں شامل بیشتر دوستوں کو بجٹ میں حصہ نہیں ملا، ڈیپارٹمنٹس میں بلا وجہ پیسے تقسیم کئے گئے مگرنتائج صفر رہے۔
بلوچستان عوامی پارٹی کے رہنما نے شکوہ کیا کہ بلوچستان میں ترقی صرف سوچا جا رہا، کرینگے اور ہو جائیگا تک محدود ہے، موجودہ حکومت کا بلوچستان میں کوئی پراجیکٹ پایہ تکمیل کو نہ پہنچ سکا، صوبے میں اسکول خستہ ہال، اسپتال ادویات سے محروم ہیں، بلوچستان میں ترقی صرف باتوں میں ہے۔
واضح رہے کہ وزیراعلیٰ جام کمال نےگزشتہ دنوں سردار صالح بھوتانی سےقلمدان واپس لیا تھا، قلمدان واپس لینے سے قبل سردار محمدصالح بھوتانی وزیربلدیات کی حیثیت سےکام کررہےتھے۔
ذرائع کا کہنا ہے کہ کابینہ کی تشکیل کے بعد سے ہی وزیر اعلیٰ اور صالح بھوتانی کے درمیان بلدیاتی حکومت کے فنڈز اور ضلع لسبیلہ کے انتظامی افسران کی ردوبدل کے حوالے سے اختلافات تھے۔
سردار محمد صالح بھوتانی طویل عرصے سے کابینہ کے اجلاس میں بھی شریک نہیں ہو رہے تھے۔
صالح بھوتانی کے قریبی ذرائع کا کہنا تھا کہ وہ کابینہ چھوڑنے کا فیصلہ کر چکے تھے کیونکہ وزیر اعلیٰ ان کے حلقے میں مداخلت کر رہے تھے اور ان سے مشاورت کے بغیر انتظامی افسران کے تبادلے اور تعیناتیاں کر رہے تھے۔
