کراچی: پی ایس ایل میں کوئٹہ گلیڈی ایٹرز کے کپتان سرفراز احمد نے تنقید کرنے پر سابق کرکٹر سلمان بٹ کو کرار جواب دے دیا۔
اے آر وائی نیوز کے مطابق سابق کرکٹر سلمان بٹ نے سرفراز احمد کی کپتانی اور کارکردگی پر تنقید کرتے ہوئے کہا تھا کہ سرفراز کھلاڑیوں سے مشورہ نہیں کرتے بلکہ اپنا فیصلہ صادر کرتے ہیں۔
سلمان بٹ کا کہنا تھا کہ سرفراز احمد دوسرے پلیئرز کو چھوڑیں اپنی کارکردگی پر توجہ دیں۔
سرفراز احمد نے سماجی رابطے کی ویب سائٹ ٹویٹر پر سلمان بٹ کے وی لاگ پر ردعمل دیتے ہوئے کہا کہ ’پاکستان کو آن ڈیوٹی بیچنے والا فکسر جب نیت پر بھاشن دے تو اللہ ہی حافظ ہے۔‘
Pakistan ko on duty beachne wala fixer jub niyat pe bhashan dega phir to Allah he Hafiz hai .#justsying
— Sarfaraz Ahmed (@SarfarazA_54) February 2, 2022
دوسری جانب اے آر وائی نیوز کے پروگرام میں سابق فاسٹ بولر تنویر احمد نے کہا کہ سلمان بٹ، محمد آصف اور عامر نے فکسنگ کی اور سزا بھی بھگتی کیا اب آپ ان کو بار بار یہ یاد دلاتے رہیں گے۔
تنویر احمد نے کہا کہ میں سلمان بٹ کی حمایت نہیں کررہا ہے لیکن سرفراز احمد کو میدان میں اپنا رویہ تبدیل کرنے کی ضرورت ہے۔
سابق فاسٹ بولر نے کہا کہ سرفراز احمد ایونٹ میں اپنی کارکردگی پر توجہ دیں، ان کی ٹیم میں بہت سارے کھلاڑی ایسے ہیں جنہیں کارکردگی کی بنیاد پر ٹیم میں شامل نہیں کیا گیا تھا۔
