وزیر اعلیٰ بلوچستان سرفراز بگٹی نے کہا ہے کہ پاکستانی قوم امن کے داعی ضرور ہیں مگر کمزور نہیں ہیں۔
تفصیلات کے مطابق وزیر اعلیٰ بلوچستان میر سرفراز بگٹی نے بھارتی میزائل حملوں کی شدید الفاظ میں مذمت کرتے ہوئے کہا ہے کہ بھارت کی جانب سے میزائل حملے کھلی جارحیت اور علاقائی امن کو سبوتاژ کرنے کی سازش ہیں۔
انہوں نے کہا کہ بلوچستان کے عوام دشمن کو منہ توڑ جواب دینے کے لیے پاک فوج کے ساتھ ہیں، بھارت کا جنگی جنون جنوبی ایشیا کو تباہی کی طرف دھکیل رہا ہے۔
مزید پڑھیں : پاک فوج بھارت کو مزید منہ توڑ جواب دے گی، ڈی جی آئی ایس پی آر
وزیراعلیٰ بلوچستان کا کہنا تھا کہ عالمی برادری بھارتی جارحیت کا نوٹس لے ہم امن کے داعی ضرور ہیں مگر کمزور نہیں، افواج پاکستان ہر قسم کی جارحیت کا بھر پور جواب دینے کی صلاحیت رکھتی ہے اور دے رہی ہے۔
دوسری جانب وزیراعلیٰ پنجاب مریم نواز شریف نے بھارت کے 5 جنگی طیارے مار گرانے پر پاک فضائیہ کو شاندار الفاظ میں خراجِ تحسین پیش کرتے ہوئے کہا ہے کہ آج بھارت کا غرور، تکبر اور جھوٹا پروپیگنڈہ فضاؤں میں جل کر راکھ ہو چکا ہے۔
وزیراعلیٰ نے اپنے بیان میں کہا کہ پاک فضائیہ نے دنیا پر یہ واضح کر دیا ہے کہ پاکستان امن کا خواہاں ضرور ہے، لیکن اپنے دفاع پر کوئی سمجھوتا نہیں کرے گا۔ یہ صرف ایک عسکری ردعمل نہیں بلکہ ایک تاریخی لمحہ ہے جسے قوم ہمیشہ یاد رکھے گی۔
