سابق ٹیسٹ کرکٹر سرفراز نواز نے وزیراعظم کو پاکستان کرکٹ کی صورتحال پر خط لکھا ہے۔
خط میں سرفراز نواز نے یوتھ اسپورٹس پروگرام کے آغاز پر وزیراعظم کو مبارکباد دی اور پی سی بی کی اندرونی سیاست پر توجہ دینےکی درخواست کی۔
خط کے متن میں کہا گیا ہے کہ پی سی بی کی اندرونی سیاست سے پاکستان کی جگ ہنسائی ہو رہی ہے نجم سیٹھی کے حواری ذکااشرف کے راستے میں رکاوٹیں پیدا کر رہے ہیں۔
خط میں کہا گیا ہے کہ وزیراعظم ذکااشرف کے چیئرمین بننے کے راستےمیں رکاوٹوں کا نوٹس لیں۔
واضح رہے کہ پی سی بی میں تبدیلیوں پر سابق کرکٹرز نے اپنے ردعمل کا اظہار کیا ہے۔ سابق کپتان راشد لطیف نے لکھا کہ ’نئی پی سی بی مینجمنٹ تجربے اور مہارت میں زیرو ہے، پاکستان میں کرکٹ کی تمام پالیسیاں اہل انٹرنیشنل کرکٹرز کی مشاورت سے بنائی جائیں۔‘
انہوں نے کہا کہ حکومت اور کرکٹ بورڈ کو پی سی بی آئین میں ترمیم کرنی چاہیے تاکہ ایسے لوگ بورڈ میں آئیں جو اپنے متعلقہ شعبوں میں تجربہ اور مہارت رکھتے ہوں۔‘