اسلام آباد : مشیر خارجہ سرتاج عزیز کا کہنا ہے کہ کلبھوشن یادیو نے پاکستان کی سالمیت کو نقصان پہنچایا، اسے قانون کے مطابق سزا سنائی ہے، کلبھوشن نوے روز میں رحم کی اپیل کرسکتا ہے۔
اسلام آباد میں پریس کانفرنس کرتے ہوئے مشیر خارجہ سرتاج عزیز نے کہا کہ کلبھوشن یادیو پاکستان میں دہشت گردی میں ملوث ہے، کلبھوشن بھارتی نیوی کا حاضر سروس افسر ہے اسے پاکستانی قانون کے مطابق سزا سنائی ہے، کلبھوشن نے مجسٹریٹ کے سامنے اپنے جرائم کا اعتراف کیا، کلبھوشن ایران سے آنے والے زائرین پر حملوں اور کوئٹہ میں ہزارہ برادری پر حملوں میں ملوث ہے۔
مشیر خارجہ نے مزید کہا کہ کلبھوشن یادیو 90 روز میں رحم کی اپیل کرسکتا ہے، 40 دن میں عدالت،60 دن میں آرمی چیف کواپیل کرسکتا ہے جبکہ صدر مملکت سے رحم کی اپیل کرسکتا ہے، کلبھوشن یادیو کے اعترافی بیان کی ویڈیو موجود ہے، بھارت نے کئی پاکستانی قیدیوں کو قونصلر رسائی نہیں دی تھی، بھارت کی جانب سے ذمہ داری کا مظاہرہ کرنا چاہیے۔
مزید پڑھیں : بھارتی جاسوس کلبھوشن کے نیٹ ورک کو پکڑنے کی کوشش کی جارہی ہے، سرتاج عزیز
سرتاج عزیز نے کہا کہ کلبھوشن یادیو بھارتی خفیہ ایجنسی’’را‘‘کے جاسوسی کرتا تھا، قانون کے مطابق کلبھوشن یادیو کو لیگل ٹیم دی گئی، کلبھوشن جاسوسی اور دہشت گردی کے الزام میں پکڑا، کلبھوشن یادیو کو گواہوں سے سوالات کا بھی موقع دیا گیا ہے۔
انھوں نے مزید کہا کہ لیفٹیننٹ کرنل(ر) حبیب ظاہر کے معاملے پر دفترخارجہ بات کرچکا ہے، کلبھوشن یادیو پسنی میں ریڈار پرحملہ کرانے میں بھی ملوث ہے۔
