واشنگٹن : امریکی وزیر خارجہ جان کیری پاکستان سے اچھے تعلقات کے حامی ہیں۔ مشیر خارجہ سرتاج عزیز سے ملاقات میں جلد پاکستان کا دورہ کرنے کا عندیہ دے دیا۔
تفصیلات کے مطابق پاک امریکہ تعلقات پر جمی برف پگھلنے لگی۔ امریکہ پاکستان کے ساتھ کثیرالجہتی شراکت داری کو فروغ دینے کیلئے تیار ہوگیا۔
وزیر اعظم کے مشیر خارجہ سرتاج عزیزاور امریکی وزیر خارجہ جان کیری کے درمیان ملاقات ہوئی جس میں باہمی تعلقات ،دہشت گردی کے خلاف جنگ اور خطے کی صورتحال پر تبادلہ خیال کیا گیا۔
لاؤس میں مشیر خارجہ سرتاج عزیز سے ملاقات میں امریکی وزیر خارجہ نے پاکستان کے بارے میں مثبت خیالات کا اظہار کیا، ترجمان دفتر خارجہ کے مطابق ملاقات میں علاقائی سلامتی، افغانستان کی صورتحال اور افغان مصالحتی عمل کی اہمیت پر بھی بات چیت کی گئی۔
جان کیری نے قبائلی علاقوں سے دہشت گردی کے خاتمے کیلئے پاکستان کے اقدامات اور حاصل کامیابیوں کو سراہا۔ جان کیری نے کہا کہ امریکہ پاکستان کے ساتھ کثیر الجہتی شراکت داری چاہتا ہے۔
انہوں نے کہا کہ باہمی تعلقات کا جائزہ لینے کے لیے پاکستان آنا چاہتا ہوں۔ ان کا کہنا تھا کہ دہشت گردی کے خلاف جنگ میں پاکستان کی کوششوں کو سراہتے ہیں۔
ترجمان دفتر خارجہ کے مطابق ملاقات میں پاک امریکہ تعلقات کا بھی جائزہ لیا گیا، دفتر خارجہ کا کہنا ہے کہ جان کیری کے مستقبل قریب میں دورہ پاکستان کے دوران پاک امریکہ دوطرفہ تعاون اور علاقائی امور پر تبادلہ خیال کیا جائے گا۔
