پاکستان شوبز انڈسٹری کے معروف اداکار و پروڈیوسر سعود قاسمی نے پاکستان فلم انڈسٹری کو تباہ کرنے والوں کا نام بتادیا۔
سعود قاسمی پاکستانی ٹی وی، فلم اداکار اور پروڈیوسر ہیں جو متعدد ہٹ پاکستانی فیچر فلموں میں اپنے ورسٹائل کرداروں کے لیے جانے جاتے ہیں، انہوں نے کامیاب ٹی وی سیریلز بھی پروڈیوس کیے ہیں، انہوں نے مقبول پاکستانی ڈراموں جیسے کہ بے بی باجی، محبت ستارنگی، اور بے بی باجی کی بہویں میں اپنی اداکاری کے جوہر دکھائے۔
View this post on Instagram
حال ہی میں انہوں نے احمد بٹ کے ساتھ ایک پوڈ کاسٹ میں شرکت کی جس میں انہوں نے فلم انڈسٹری کی تباہی کا ذمے دار اداکار شان اور ڈائریکٹر سید نور کو ٹھہرایا۔
شان شاہد کے بارے میں بات کرتے ہوئے سعود قاسمی نے کہا کہ شان کو چاہیے کہ وہ دوسروں کی غلطیوں کی نشاندہی کرنا چھوڑ دیں اور اپنی خامیوں کو دور کرنے پر توجہ دیں، تب ہی وہ ایک بہتر انسان بن سکتا ہے۔
اداکار کا کہنا تھا کہ میرے خیال میں دوسروں پر تنقید کرنا غلط ہے، میں اسے پہلے ہی کہہ چکا ہوں کہ وہ ایسا کرنا چھوڑ دے، ہر چیز کا ایک وقت ہوتا ہے، اور سیکھنے کا عمل کبھی ختم نہیں ہوتا، ایک اداکار ہمیشہ اچھے کام کی تلاش میں رہتا ہے اور اپنے فن میں مسلسل بہتری لاتا رہتا ہے۔
سعود قاسمی نے یہ بھی کہا کہ پاکستانی فلم انڈسٹری کو شان شاہد، سید نور اور دیگر نے تباہ کیا، انہوں نے کہا ’’لالی ووڈ کو بہت سے لوگوں نے تباہ کیا، جن میں سے کچھ اب انتقال کر چکے ہیں، لالی ووڈ کو شان، سید نور اور دیگر لوگوں کی وجہ سے خاصا نقصان اٹھانا پڑا جو صرف اپنے ذاتی فائدے میں دلچسپی رکھتے تھے‘‘۔
انہوں نے مزید کہا کہ میں، معمر رانا اور شان نے ایک ساتھ بیٹھ کر فیصلہ کیا کہ ایسی بری فلموں میں کام نہیں کریں گے جو بندوقوں اور لڑائیوں کو فروغ دے رہی ہوں، ہم سب نے مل کر فیصلہ کیا، لیکن انہوں نے وہ فلمیں سائن کیں، اور میں نے انکار کر دیا جس کا نتیجہ یہ نکلا کہ پروڈیوسرز نے میرا بائیکاٹ کیا تو میں نے کراچی آکر شادی کر لی۔
کراچی اور لاہور کے کام کے ماحول سے متعلق سعود کا کہنا تھا کہ کراچی میں ڈرامہ پروڈکشن میں 90 فیصد فنکار لاہور سے آئے ہوئے ہیں اور کراچی کے مزاج سے مطابقت لیکر کام کررہے ہیں۔
