سعودی عرب نے ایران اور اسرائیل کے درمیان بڑھتی ہوئی کشیدگی کے باعث شہریوں اور رہائشیوں کے لیے ٹریول ایڈوائزری جاری کردی ہے۔
سعودی خبر رساں ادارے کی رپورٹ کے مطابق ایران اور اسرائیل کے درمیان بڑھتی ہوئی کشیدگی کے باعث مشرق وسطیٰ میں متعدد ممالک نے اپنی فضائی حدود کو عارضی طور پر بند کردیا ہے۔
سعودی عرب کے بڑے ایئرپورٹس کے حکام نے مسافروں کیلیے ٹریول ایڈوائزری جاری کرتے ہوئے مشورہ دیا ہے کہ وہ ایئرپورٹ جانے سے پہلے اپنی ایئرلائنز سے رابطہ کریں تاکہ کسی قسم کی پریشانی سے محفوظ رہ سکیں۔
رپورٹس کے مطابق سوشل میڈیا پر جاری ایڈوائزری میں کنگ عبدالعزیز انٹرنیشنل ایئرپورٹ جدہ، کنگ خالد انٹرنیشنل ایئر پورٹ ریاض، کنگ فہد انٹرنیشنل ایئرپورٹ دمام اور مدینہ منورہ کے امیر محمد بن عبدالعزیز انٹرنیشنل ایئرپورٹ کے حکام نے کہا ہے کہ فضائی حدود کی بندش سے متاثر ہونے والے مسافروں کو مشورہ دیا جاتا ہے کہ وہ ائیرپورٹ جانے سے قبل اپنی ایئرلائنز سے براہ راست رابطہ کریں۔
پروازوں کے بارے میں تازہ ترین اپ ڈیٹس کی تصدیق کسی بھی غیر متوقع تاخیر یا تبدیلی سے بچنے کے لیے ہے۔
واضح رہے کہ اسرائیل نے ایران کے مہرآباد ایئرپورٹ کے قریب فضائی حملے کئے ہیں، حملوں کے باعث ہوائی اڈے کو نقصان پہنچنے کی اطلاعات موصول ہوئی ہیں۔
اسرائیل کی جانب سے مہر آباد ایئرپورٹ کے قریب کئے گئے فضائی حملے کے بعد متاثرہ علاقے سے دھوا اُٹھتا ہوا دیکھا گیا۔ وسطی تہران میں بھی دھماکوں کی آوازیں سنی گئیں۔
جبکہ ایران کی جانب سے اسرائیل پر پانچواں میزائل حملہ کیا گیا ہے، چوتھے حملے میں میزائل اسرائیلی دارالحکومت تل ابیب کے عین وسط میں گرا تھا، جس میں اسرائیلی جوہری تحقیق مرکز کو نشانہ بنانے کا دعویٰ کیا جارہا ہے۔
ایران پر اسرائیلی حملے میں ہمارا کوئی کردار نہیں، برطانیہ
تل ابیب اور مقبوضہ بیت المقدس میں سائرن کی آوازیں گونج رہی ہیں، اسرائیلی فوج کا کہنا ہے کہ ایران کی جانب سے فائر کئے گئے میزائلوں کو روکنے کے لیے دفاعی نظام کو متحرک کردیا گیا ہے۔
