ریاض: سعودی عرب کی پہلی اینی میٹڈ فلم الرحلہ جلد 15 ایشیائی ممالک میں پیش کی جائے گی، فی الحال یہ فلم مشرق وسطیٰ، شمالی افریقہ اور جاپان میں ریلیز کی جاچکی ہے۔
سعودی ویب سائٹ کے مطابق محمد بن سلمان فاؤنڈیشن (مسک) کے ماتحت منگا پروڈکشن کمپنی اور صالون فلمز کمپنی نے سعودی اینی میٹڈ فلم الرحلہ 15 سے زیادہ ایشیائی ممالک میں ریلیز کرنے کا معاہدہ کرلیا۔
یہ فلم منگا کمپنی نے جاپان کی تولی اینی میشن کمپنی کے تعاون سے تیار کی ہے، فلم 2021 کے دوران مشرق وسطیٰ، شمالی افریقہ اور جاپان میں ریلیز کی گئی تھی۔ جہاں جہاں فلم دیکھی گئی وہاں اسے سراہا گیا۔
معاہدے کے تحت الرحلہ سعودی فلم ایشیا کے 15 سے زائد ممالک کے سینما گھروں اور مشہور نشریاتی پلیٹ فارمز پر پیش کی جائے گی۔ علاوہ ازیں فلم 6 یورپی ممالک میں دکھائی جائے گی، ان دنوں یہ فلم جاپان کے 20 نشریاتی پلیٹ فارمز پر پیش کی جارہی ہے۔
منگا کمپنی کے ایگزیکٹیو چیئرمین ڈاکٹر عصام بخاری کا کہنا ہے کہ ہمیں یہ اطلاع دیتے ہوئے خوشی محسوس ہو رہی ہے کہ صالون فلمز کے ساتھ الرحلہ فلم ریلیز کرنے کا معاہدہ ہوگیا ہے۔
انہوں نے کہا کہ الرحلہ پہلی سعودی جاپانی اینی میٹڈ فلم ہے، یہ دنیا کے تمام حصوں تک پہنچائی جارہی ہے، ایشیا کی مارکیٹ اس حوالے سے بے حد اہم ہے جہاں اس قسم کی فلمیں پسند کی جاتی ہیں۔
