ریاض: سعودی عرب کے محکمہ زراعت کی جانب سے جاری رپورٹ میں بتایا گیا ہے کہ ملک بھر میں کھجور کے تین کروڑ 43 لاکھ درخت موجود ہیں جن سے سالانہ ایک کروڑ 43 لاکھ ٹن سے زائد کھجوریں حاصل کی جاتی ہیں۔
عرب میڈیا رپورٹس کے مطابق سعودی عرب کے زرعی ادارہ برائے شماریات کی طرف سے جاری کردہ ایک رپورٹ میں بتایا گیا ہے کہ مملکت میں مجموعی طورپرکھجور کے 3 کروڑ 43 لاکھ درخت ہیں۔
رپورٹ میں بتایا گیا ہے کہ اعلیٰ معیار کی کھجوروں کے درخت کی تعداد 74 لاکھ کے قریب ہے جبکہ دوسرے نمبر پر زرد رنگ کی کھجوروں کے درخت ہیں جن کی تعداد 4 لاکھ 68 ہزار کے قریب ہے۔
محکمہ زراعت کے مطابق جن سے گذشتہ برس ایک کروڑ 43 لاکھ ٹن خالص اور میٹھی کھجور حاصل کی گئیں۔ سروے رپورٹ کے مطابق سعودی عرب میں پھل دار کے درختوں کی مجموعی تعداد 25 اعشاریہ 92 ملین ہے جن میں سے زیتون کے درختوں کی تعداد 7 کروڑ 71 لاکھ 20 ہزار کے قریب ہے۔
سروے رپورٹ میں بتایا گیا ہے کہ مملکت میں بھیڑوں ، بکریوں کی تعداد اوسطاً 93 لاکھ 90 ہزار کے قریب ہے جن میں سے 57 لاکھ 70 ہزار بکریاں ہیں۔
