ریاض: سعودی عرب نے پاکستانی تارکین وطن کو سال میں ایک بار سے زائد ملک جانے کی تردید کردی، سعودی مخمکہ پاسپورٹ نے ایسے کسی بھی احکامات کے نفاذ کی نفی کی ہے۔
تفصیلات کے مطابق جدہ میں پاسپورٹ ڈپارٹمنٹ میں میڈیا مینیجر میجر طلال امام شلہوب کی جانب سے جاری ایک وضاحت میں انہوں نے کہا ہے کہ یہ اطلاع غلط ہے، اور کمپنیاں ملازمین کے لئے کتنے ویزے جاری کرسکتی ہیں یہ تمام تر معلومات ابشر ویب سائٹ پر موجود ہے جہاں سے تصدیق کی جاسکتی ہے۔
عرب نیوز کے مطابق پاکستانی سفارتخانے نے سعودی حکام کی جانب سے اس معلومات کی تردید کی ہے اور کہا کہ انہیں اس طرح کی کوئی معلومات سعودی حکام کی جانب سے موصول نہیں ہوئی ہے۔
اس سے قبل ریاض میں موجود پاکستانی سفارتخانے کےکمیونٹی ویلفیئر اتاشی نے سعودی اعلی حکام کو خط لکھ کر پاکستانیوں پر ایک سے زائد بار اپنے ملک جانے پر پابندی کے معاملے پر توجہ دینے کا کہا تھا.
پاکستانی سفارتخانے کی جانب سے ہدایات کی گئی تھیں کہ وہ پاکستانی جو سال میں ایک سے زائد بار اپنے وطن سفر کریں وہ سفارتخانے سے رابطہ کریں۔
واضح رہے کہ سعودی عرب میں 20 لاکھ سے زائد پاکستانی مقیم ہیں .
سعودی امیگریشن حکام کی جانب سے اعداوشمار جاری کئے گئے ہیں جس کے مطابق گزشتہ برس میں 5 لاکھ سے زائد پاکستانی سعودی عرب گئے ہیں۔
